Ntogozi 42

Malombezo ya mnyika

1Saviya mpala ikubesa soko ya mazi,

nivyo nami hukukumeila mate weye Zumbe Chohile ywangu.

2Nna nchilu ya Chohile ywangu mta ujima.

Nanibule ini kwakwe niwone uso wakwe?

3Naila chilo na msi,

mesozi yatenda niyo inkande yangu,

kuno wantu wanuza chila zuwa,

“Chohile ywako ekuhi?”

4Mbuli zino nazikumbuka kwa chinyulu mo umoyo wangu.

Ivyo nendile na lukudidi lwa wantu,

hawalongoza kwita kwe Inyumba ya Chohile,

wakatowa nchelejele za kumhongeza Chohile.

5Ni mbwani nangadika savino mo umoyo wangu?

Ni mbwani natumbwazika mndani mwangu?

Nanike msuhi wangu kwa Zumbe Chohile,

kwaviya nanimtogole vituhu Chohile,

uyo ni wambizi wangu na Chohile ywangu.

6Simemwa ni chihovu mo umoyo wangu,

elo, nahukumbuke weye Chohile kulawa kweisi ya Yolodani,

mwa amagulu ya Helimoni na Mizali.

7Mto una mzimilizo wetanga mtuhu,

neva izwi dya mazi ya bohole,

mabohwelo ya mazi na mawimbi yako yanididimiza.

8Zumbe Chohile naniwonele mbazi zakwe nomsi,

miye nanimchemele nchemo ya ntogozi nechilo,

nilombeze kwa Chohile ywangu akuninka ujima.

9Namgambila Chohile ywangu akunidima,

“Ni mbwani kunijala?

Ni mbwani nitumbwazike halomboleza,

kwachausa cha kubunyanywa ni mnkondo ywangu?”

10Silumizwa kwa mahuluto yawo,

chila zuwa wanuza, “Ekuhi Chohile ywako?”

11Ni mbwani nangadika savino mo umoyo wangu?

Ni mbwani natumbwazika mndani mwangu?

Nanike msuhi wangu kwa Zumbe Chohile,

kwaviya nanimtogole vituhu Chohile,

uyo ni wambizi wangu na Chohile ywangu.