Ntogozi 41

Malombezo ya mntu mnyonje

1Kajimbikwa yudya mntu akuwaunduguza wachiwa,

Zumbe Chohile namwambule chipindi cha nkunto.

2Zumbe Chohile namdime na kumwambula,

uyo nachumilwe mweisi,

Zumbe Chohile hamleke mwe imikono ya wankondo wakwe.

3Zumbe Chohile namwambize umo akatenda mnyonje,

namhonye unyonje wakwe wose.

4Weye Zumbe Chohile, nihonya,

“Weye Zumbe Chohile niwonela mbazi,

kwaviya sikukola masa weye.”

5Wankondo wangu wanilonga vihiye,

“Nabanike ini ne idizina dyakwe dyagile chakumbago?”

6Chila mntu akwiza kunikaula, alonga milosi yo udanti,

wachisanya mbuli za kuniziga,

wakaheza wazibwelekeza kuno na kuno.

7Wankondo wangu wose watakalisana mwa miye,

wanifanyanyiza yehiye,

8wagamba, “Apwata unyonje udya wamkoma,

mudya mo lusazi lwakwe hakuhona.”

9Hata mbuyangu ywa hajihi, nikiye msuhi mwakwe,

hudya naye nkande yangu

kanihituka na kunebunga.

10Weye Zumbe Chohile niwonela mbazi,

ninka luhulwila vileke niwalihize chikoda.

11Simanya kugamba wawagilwa ni miye,

kwaviya wankondo wangu hawanihude.

12Weye wanambiza kwaviya nadamanya yedi,

wanika kulongozi kwako mazuwa yose.

13Mtogoleni Zumbe Chohile, Chohile ywa Izulaeli,

kukongela chikale na chikale.

Taile! Taile!