Ntogozi 40

Nchemo ya ntogozi

1Nasimgoja Zumbe Chohile kwa kujijimiza,

niyo anihitukila na kwiva indilo yangu.

2Niyo anusa kwe idibome dyo ubanasi,

kanusa mwe ntagata na utelezi,

niyo anichimalisa mlanga mwe luwe,

na kudindimaza hadya nichimale.

3Kanihinya nchemo mpya,

nchemo ya ntogozi kwa Chohile ywetu.

Wantu walozize nawawone na kogoha,

nawaike msuhi kwa Zumbe Chohile.

4Kajimbika mntu yudya akwika msuhi wakwe kwa Zumbe Chohile,

mntu hakwehanga na wantu wakweduvya,

wantu wagile kwa kuvikila milungu yo udanti.

5Weye Zumbe Chohile, Chohile ywangu, kuchidamanyiza mbuli zilozize hazikuwazika,

kudamanya mbuli zikwehela zilozoze mwetu, hahana akudaha kuzichinda,

nanitambalise na kuzilonga,

mna zilozesa kuzitamwila.

6Weye hukunga ntambiko hegu malavyo,

ntambiko za kutikimya na za kusa masa,

mna kuninka magutwi vileke hwive.

7Naho nigambile, “Miye nihano siza,

kwaviya yadya hungwa nidamanye yawandikwa mwe ichitabu che isigilizi.”

8Weye Zumbe Chohile, nabesa nidamanye viya ukunga,

sigilizi yako imndani mo umoyo wangu.

9Sitambalisa mbuli yedi yo ukombola wako kulongozi kwe lukudidi lwa wantu.

Saviya umanyize weye Zumbe Chohile,

miye silekile kuitambalisa imbuli yako mwa awantu.

10Sifisize wambula wako uninkile mo umoyo wangu,

mazuwa yose sitambalisa ukanuni wako ne ichindedi chako.

Sifisize kulonga uwagila wako,

ne ichindedi chako kulongozi kwe bunga kulu dya wantu.

11Weye Zumbe Chohile usekuninyima mbazi zako,

ungi wako ne ichindedi chako vinidime mazuwa yose.

Lombezo dya kunga wambizi

12Kwaviya sizungulukwa ni nkunto hezikuwazikwa,

masa yangu yanigubika sikuwona,

yaloza kujinka izifili momtwi wangu,

miye sifa chevu mo umoyo wangu.

13Weye Zumbe Chohile unge kunambula,

weye Zumbe Chohile sunguza wize unambize.

14Wose wakulonda ujima wangu vileke wanikome,

wajelwe soni na kuhuza.

Awo wakujelejeza miye nikomwe,

wavuzwe kunyuma kwa soni.

15Wadya wakunisezenga,

wahuze kwa soni zawo.

16Mna wadya wose wakukulonda weye,

watowe nchelejele na kwelelwa.

Wakunga wambula wako mazuwa yose,

wagambe, “Zumbe Chohile Kakulisa!”

17Miye ni mchiwa naho ni msokezi,

mna weye Zumbe nifanyanya.

Weye nuyo mwambizi ywangu na Mwambula ywangu,

sunguza wize, weye Chohile ywangu.