Ntogozi 39

Kweila kwa mntu akusulumizwa

1Nasilonga, “Nanidime uwikazi wangu,

na kuchinda ululimi lwangu, nnasekukola masa kwa kulonga kwangu.

Nanigubike umlomo wangu chipindi chose wavu wakatenda hajihi na miye.”

2Nasitenda saviya chimumu silongile chintu,

nasinyamala mna sipatile luhulwila.

Ulumi wa amasulumizo yangu wongezekela,

3kwangadika kwangu kunilumiza umoyo.

Ivyo nijendeleze kufanyanya nivyo nangadike,

aho niyo nalonga imilosi ino,

4“Weye Zumbe Chohile nigambila udumo wo wikazi wangu,

mazuwa yangu yo ujima yasigala mengahi,

ninka kumanya uwikazi wangu ivyo ukusunguza kujinka.”

5Wikazi wangu kuutenda mjihi saviya muye,

wikazi wangu sicho chintu kulongozi kwako.

Wikazi wa chila mntu ni saviya muye du,

6chila mntu ajinka saviya chizuli,

kuhikiliza kwakwe kose ni bule du,

achisanya ugoli ulozize, mna hammanyize uyo akunga aupate.

7Mna haluse Zumbe Chohile nilonde chibwani?

Msuhi wangu wi kwako weye.

8Nambula mwa amasa yangu yose,

usekuzumila wahezi wanitile.

9Nasinyamala dwii, sikulonga chintu,

sigubule mlomo wangu kwaviya ni weye udamanye yano.

10Usekunikantila vituhu,

kwaviya nihaguhi na kubanika kulawana ne izinkanto zako.

11Wakwahila na kukantila wantu kwachausa cha amasa yawo,

wabalanga ugoli wawo saviya mswa ukubalanga,

chindedi chila mntu ni saviya muye du!

12Weye Zumbe Chohile wetegeleze amalombezo yangu,

tegeleza indilo yangu unambize,

usekunyamala umo haila.

Kwaviya miye ni saviya mjeni akujinka du,

ni mtafi saviya wendaga wakale wangu wose.

13Leka kunisinya vileke nelelwelwe hadodo,

sinati kubanika nisekutendeka mwe isi vituhu.