Ntogozi 38

Malombbezo ya mntu akusulumizwa

1Weye Zumbe Chohile, usekunikwahila kwa amaya yako,

usekunifinyankiza kwa maya yako.

2Misale yako inilasa,

mkono wako unikantila.

3Kwachausa cha amaya yako, nimwe masulumizo yatendese, mwili wangu wose waluma,

kwachausa cha amasa yangu,

4Sigubikwa ni masa vitendese,

saviya mbundu uzamise mwangu.

5Makwenje yangu yawola na kununka,

kwachausa cho uhezi wa amasa yangu.

6Sinamizwa hasi na kuselezwa vitendese,

msi mjima nakwela hasela nalomboleza.

7Mgongo wangu umema ulumi ukoka,

hamna luhulwila mo mwili wangu.

8Sitigintika na kusokela,

nasulumila mo umoyo kwa ulumi mkulu.

9Weye Zumbe Chohile, kuvimaya viya hunga vyose,

ivyo hunga vyose havikufisika kulongozi kwako.

10Moyo wangu watuntisa, nguvu zangu zinisila,

hata ameso yangu yengila luzuyu.

11Wambuya na weyangu wanenega kwachausa cha amasulumizo yangu,

wehajihi hangu wekala hale na miye.

12Wadya wakunga wanikome wenika mitego yawo,

wadya wakunga nilumile wanitisa kunikoma,

walafya yehiye msi mjima.

13Miye ni saviya chiziwi, hekudaha kwiva,

ni saviya chimumu, hekudaha kulonga chintu.

14Sitenda saviya mntu hekwiva,

uyo mlomo wakwe haukudaha kuhitula chochose,

15mna miye nakugoja weye Zumbe Chohile,

weye Zumbe Chohile, Chohile ywangu nonihitule.

16Nakulombeza usekuwaleka wankondo wangu welelwe,

naho wasekweduvya mwangu umo hagwa,

17kwaviya nihaguhi na kugwa,

no ulumi wangu wanebunga chila zuwa.

18Neila uwavu wangu,

kwaviya natumbwadiswa na amasa yangu.

19Wankondo wakunihiwa hehena luhosa waloza,

awo hewekununga vya bule hawakuwazika.

20Awo waliha wihi kwa wedi nidamanye,

wanihiga kwaviya nadamanya yedi.

21Weye Zumbe Chohile usekunasa,

usekutenda hale na miye, weye Chohile ywangu.

22Sunguza wize unambize,

weye Zumbe Chohile, Mwambula ywangu.