Ntogozi 37

Uhelo wa wantu wedi na wantu wehiye

1Usekutumbwazika kwachausa cha wantu wavu,

usekuwadila finju wantu wakutenda yehiye,

2kwaviya, nawasunguze kunyala saviya mani,

nawasunguze kubanika saviya mani maisi.

3Ika msuhi kwa Zumbe Chohile na udamanye yedi,

vileke wikale vyedi mwe isi na kwikala kwa kwenenwa.

4Mbwedo wako ulondele kwa Zumbe Chohile,

uyo nakwinke yadya ukunga mo umoyo wako.

5Mwinke Zumbe Chohile izisila zako zose,

mwikiye uyo msuhi na uyo nakwambize,

6nadamanye uwedi wako umweke saviya mmweko,

na ukanuni wako saviya zuwa dya msi.

7Tondowala kwa Zumbe Chohile, mgoje kwa kujijimiza,

usekwetumbwadisa na wantu wakuchumilwa,

hegu awo wakuchumilwa kwa mizungu ihiye.

8Leka maya naho usekwihiwa,

usekutumbwazika, kwaviya nayakulongoze kwe wihi.

9Kwaviya wantu wakudamanya mbuli zihiye nawabindwe pele,

mna wakumwikiya msuhi Zumbe Chohile nawalisi isi.

10Chisigala chipindi chijihi, wakudamanya yehiye nawasunguze kwagila,

hatahegu nowalonde howawone.

11Mna wakunyanyahala nawailisi isi,

naho nawabwede utondowazi ulozese.

12Mwavu awafungila njama wakanuni,

waluma imilomo kwa maya,

13mna Zumbe Chohile awaseka wavu,

kwaviya kamanya zuwa dyawo dyo kukantilwa dyeza.

14Wantu wavu wasomola izisime zawo na kukwesa nyuta zawo,

vileke wawakome wachiwa na hewene chintu,

wawachinje wadya wakwikala ko ukanuni,

15mna izisime zawo nazitunge imyoyo yawo wenye,

ne izinyuta zawo nazivunwe vunwe.

16Viwagile ugoli mjeche wa mntu mkanuni,

ukaleka ugoli ulozize wa wantu wavu,

17kwaviya nguvu za wavu nazivunwe,

mna Zumbe Chohile namdime mkanuni.

18Zumbe Chohile adima wikazi wa wantu wakanuni,

na ulisi wawo wekalisa mazuwa yose.

19Mazuwa ya nkunto hawangadike,

mazuwa ya gumbo nawatende na nkande ilozize,

20mna wavu nawakomwe,

wankondo wa Zumbe Chohile nawosike saviya maluwa kwenkonde,

nawosike saviya mosi.

21Mntu mwavu akopa naho hakuliha deni,

mna mkanuni alavya kwa chisekwesekwe.

22Wadya wajimbikwe ni Zumbe Chohile nawailisi isi,

mna wadya akuwaligita nawakomwe wamlawe mwe isi.

23Uneva Zumbe Chohile anawagizwa ni mijendele ya mntu,

atogeza izinkacho za uyo mntu,

24hata akekobadika hakugwa,

kwaviya Zumbe Chohile amwinula kwa mkono wakwe.

25Nendaga mbwanga haluse sidalahala,

mna sawonaga mpwii mkanuni akasigwa ni Chohile,

hegu wanawe wakalombeza nkande.

26Nkanana zose awantu awo wana chisekwesekwe wakopesha hehena kutigiza,

wana wawo wajimbikwa.

27Leka wihi damanya yedi,

weye nowikale mweisi mazuwa yose,

28kwaviya Zumbe Chohile awaunga wakanuni,

uyo hawaleke awakanuni wakwe.

Nawadimwe mazuwa yose,

mna cheleko cha wantu wavu nawakomwe.

29Wakanuni nawailisi isi,

nawekale umo mazuwa yose.

30Mntu mkanuni alonga milosi yo ubala,

na ululimi lwakwe lwalonga milosi ikuwagila.

31Atoza sigilizi ya Chohile ywakwe mo umoyo wakwe,

hakutela mo ulujendo lwakwe.

32Mntu mwavu amnyatila mntu mkanuni vileke ajeze kumkoma,

33mna Zumbe Chohile hawaleke mwe imikono yawo,

naho hawaleke wakantilwe kugamba ni wabanasi umo wakalahwa.

34Ika msuhi kwa Zumbe Chohile na kutoza isila yakwe,

uyo nakutunye na ulisi isi,

umo wavu wanakomwa noviwone ivyo.

35Nawonaga mntu mwavu naho ni nyakwili vitendese,

akachumilwa saviya mti wa mwaloni wa Lebanoni,

36mna niyo asunguza kusika naho hawoneke vituhu,

hata nize nimlonde simuwone.

37Wakaule wantu wedi na wakanuni,

wakaulise wantu wakanuni,

mntu akunga utondowazi achumilwa,

38mna wakudamanya masa wose nawakomwe,

na kuchumilwa kwawo nakusigwe.

39Zumbe Chohile awambula wantu wakanuni,

na kuwadima chipindi cha nkunto.

40Zumbe Chohile awambiza na kuwambula,

awambula kulawa mwe wantu wavu na kuwadima,

kwaviya wasumkila ugombezi kwakwe.