Ntogozi 36

Wavu wa wantu

1Masa yalonga na mntu mwavu,

kundani vitendese mo umoyo wakwe,

mbuli ya kumvikila Chohile haimuli mo umomoyo wakwe.

2Kwaviya mwavu etogolesa mwenye,

afanyanya kugamba wavu wakwe haubunkulwe na kuligitwa.

3Milosi ye imilomo yakwe ni wavu naho yo udanti,

kaleka kujeseza ubala na kudamanye yedi.

4Afanyanya kudamanya wihi, hata akatenda mo lusazi lwakwe,

ejela mwe sila ya masa,

hakulemela dihiye.

Wedi wa Chohile

5Weye Zumbe Chohile ungi wako wabula kwembingu,

ukanuni wako wabula ko ulanga.

6Uwagilwa wako ni saviya magulu makulu,

nkanto zako ni saviya mzumilizo mtali vitendese.

Weye Zumbe Chohile wawadima wantu na wanyama.

7Ungi wako hewine udumo ni wa yombe kulu vitendese!

Wantu wasumkila hechizuli cha amawawa yako.

8Webwedeza mwe ulozo we ivintu vya mnyumba mwako,

weye nowanywese mo umto wo uwedi wako.

9Ni weye nkongelo yo ujima,

kwachausa cho ulangazi wako chawona ulangazi.

10Jendeleza ungi wako kwa waya wakumanyize weye,

uwagila wako kwa wadya wachumile moyo.

11Usekuzumila wata kweduvya wanebunge,

hegu wantu wavu wanibalaze.

12Kaula ivyo wantu wehi wagwele,

wadulwa hasi, hawakudaha kwinuka!