Ntogozi 35

Kulombeza wambizi

1Weye Zumbe Chohile, wahige wadya wakunihiga,

towana na wadya wakutowana na miye.

2Guha ingao yako ne inchinga yako,

wize unambize.

3Inula idiguha dyako ne isime yako mwa awo wakunitimila.

Ugambile untu wangu kugamba nonambule.

4Wahayuse na kuwajele soni wadya wakulonda ujima wangu,

wadya wakulafya kunikoma

wavuzwe kunyuma kwa soni.

5Watende saviya makanka yakufiliswa ni nkung'unto,

kuno wabalazwa ni mndima ywa kwembingu ywa Zumbe Chohile!

6Sila yawo itende chiza na utelezi,

wakabalazwa ni mndima ywa kwembingu ywa Zumbe Chohile.

7Siwadamanye dyodyose nawanitegela mitego hehena luhosa,

wanisimbila bome hehena mbuli yoyose.

8Wasunguze kugwelwa ni mabuli wowo wenye,

wagwizwe mwe mtego wawo wenye,

wagwele mwe idyo idibome kwa file yawo.

9Aho miye nanelelwe kwachausa cha Zumbe Chohile,

nantowe nchelejele kwaviya uyo kanambula.

10Nanimgambe Zumbe Chohile kwa moyo wangu wose,

“Weye Zumbe Chohile hahana akwinga weye!

Weye wawambula wasokezi kulawa mwe mikono ya wata nguvu kujinka wowo,

mchiwa na hene chintu kulawa mwe wadya wakuwahoka.”

11Wantu wavu waninukila,

waniziga mbuli sizimanyize.

12Waniliha wihi kwa wedi,

na kuwasa untu wangu mwe chiholozi.

13Mna umo wendile wanyonje,

navalaga majuniya kulagisa chihovu,

sesulumiza kwa kuleka nkande.

Senamiza umtwi wangu hasi umo havika,

14saviya namwilila mbuyangu hegu mlukolo ywangu,

sikwela hasela uko na uko kwa chihovu,

saviya akulomboleza file ya nine.

15Mna miye nize nekobadike, wechisanya wanisezenga,

wanebunga chahamwenga miye simanyize.

Wanebunga hehena udumo.

16Saviya wantu hewekumvikila Chohile wanitila,

wanilumila memo kwa maya.

17Weye Zumbe Chohile nokaule kubula ini?

Nambula uwikazi wangu no kunebunga kwawo,

nambula ujima wangu kulawa mwe izisimba izo!.

18Aho miye nahutunye kulongozi kwe mdugano mkulu wa wantu,

nahutogole kulongozi kwa wantu wose.

19Usekuwaleka awankondo awo wakunitila,

awo wakunihiwa vya bule welelwe kwa masulumizo yangu.

20Milosi wakulonga siyo yedi,

watula mabuli yo udanti mwa awekazi wakwikala mwe isi kwa utondowazi.

21Wanilaha kwa izwi wakagamba,

“Heye chiviwona kwa meso yetu wenye ivyo udamanye!”

22Mna weye Zumbe Chohile vino kuviwona,

usekunyamala, weye Zumbe Chohile usekutenda hale na miye.

23Weye Zumbe Chohile inuka unigombele,

wize weye Zumbe Chohile ywangu ukaule imbuli yangu.

24Weye Zumbe Chohile nikantila viya vikukuwagila, kuligana no uwagilwa wako,

usekuwaleka wanisezenge.

25Usekuwaleka wafanyanye,

“Chichumilwa mwe viya chungile!”

“Yuno chimdaha.”

26Wajelwe soni na kwagilwa,

wose wakwelelwa izinkunto zangu,

wahayuswe na kuhuza,

Wose wakwewona ni wedi kujinka miye.

27Mna wadya wakuniwona sina mlema,

watule lwasu kwa chinyemi mazuwa yose wagambe,

“Zumbe Chohile kakulisa!

Awagizwa ni kuchumilwa kwa mndima nywakwe.”

28Aho miye nanitambalise ukanuni wako,

nanilonge ntongozi zako msi wose.