Ntogozi 34

Ntogozi kwa wedi wa Chohile

1Nanimhongeze Zumbe Chohile mihililimo yose,

sanileke mpwii kuzilonga izintogozi zakwe.

2Miye nefenya viya Zumbe Chohile atendile,

wasokezi weve na kwelelwa.

3Miye hamwenga na nyuwe chimtogoleni Zumbe Chohile,

chimwinke ntunyo chahamwenga idizina dyakwe.

4Nasimlombeza Zumbe Chohile, niyo anihitula,

na kunusiza izinkama zangu zose.

5Wadya wakumkaula Chohile nawelelwe,

nanywi hamjelwe soni mpwii.

6Yuno mchiwa kamwilila Zumbe Chohile, uyo kamwiva,

na kumwambula mwe izinkunto zakwe zose.

7Mndima ywa kwembingu ywa Zumbe Chohile awadima wose wakumvikila Zumbe Chohile,

na kuwambula mwe nkondo.

8Jezani muwone kugamba Zumbe Chohile ni ywedi,

mbwedo wi kwa yudya mntu akusumkila ugombezi kwakwe.

9Mvikileni Zumbe Chohile nyuwe wakuka wakwe,

kwaviya wadya wakumvikila hawahungukilwe ni chintu chochose.

10Hata wana simba wahungukilwa na kuwona sala,

mna wadya wakumvikila Zumbe Chohile hawakuswesa chochose chedi.

11Soni nyuwe wana mnitegeleze,

miye naniwahinyeni kumvikila Zumbe Chohile.

12Togola, waunga mbwedo mo wikazi wako?

Togolani maunga mwelelwe na wikazi mtali?

13Elo, leka kulonga yehiye,

na kulonga udanti.

14Kwenege wavu, damanya yedi,

londa utondowazi na kuutozesa.

15Zumbe Chohile awakaula wakanuni,

etegeleza viya wakulombeza,

16mna awahiga wantu wakudamanya wavu,

ivyo, wanabanika wasunguza kujalwa mwe isi.

17Wakanuni wakamwilila Zumbe Chohile, uyo aweva,

na kuwambula mwe izinkunto zawo zose.

18Zumbe Chohile ehajihi na wafile chevu,

awambula wazize lunda vitendese.

19Masulumizo ya mkanuni yaloza,

mna Zumbe Chohile amwambula mwe yose.

20Adima ivitago vyo umwili wakwe wose,

hahana hata vuha dyakwe dimwenga nadivunike.

21Wihi wawegaila wavu file,

wankondo wa wakanuni nawakantilwe.

22Zumbe Chohile ambula wandima wakwe,

wadya wose wakusumkila ugombezi kwakwe hawakantilwe.