Ntogozi 33

Nchemo ya Ntogozi kwa Chohile

1Towani nchelejele kwachausa cha Zumbe Chohile nyuwe mkumogoha!

Kwaviya awagila kumtogola ni wadya wachumile moyo.

2Mtogoleni Zumbe Chohile kwa malimba

na zeze dina nyaya mlongo.

3Mchemeleni nchemo mpya,

towani visindamgunda malimba vinamwile, towani nchelejele za mbwedo.

4Ulosi wa Zumbe Chohile ni wachindedi,

ne izintendwa zakwe zose nizo ukanuni.

5Zumbe Chohile aunga uchindedi na uwagila,

isi imema ungi wakwe hewine udumo.

6Ulanga umbwa kwa ulosi wa Zumbe Chohile,

ne ivintu vyose viyumo vilawana no umuye wo umlomo wakwe.

7Kachisanya mazi ye ibahali saviya mwe nyungu,

mizumilizo ye ibahali kavika mwe msungi.

8Isi yose wamogohe Zumbe Chohile!

Wekazi wose mweisi wamtunye!

9Kwaviya Chohile alongaga isi niyo yatendeka,

kalavya lagizo niyo yadindimala.

10Zumbe Chohile achinda mizungu ya wantu we izisi ntuhu

na kuhituila fanyanyi zawo.

11Mna mizungu ya Zumbe Chohile yekala mazuwa yose,

viya akunga vyekala vyeleko vyose.

12Mbwedo ni kwe isi idya Chohile ywawo ni Zumbe Chohile,

wantu awo asagule watende ulisi wakwe.

13Zumbe Chohile akaula hasi kulawa kwe imbingu,

na kuwawona awantu wose.

14Kulawa kwe ichigoda chakwe cho ukuka,

awakauka awekazi wakwikala mwe isi.

15Uyo adamanya imyoyo ya wantu wose,

uyo akaula chila chintu wakutenda.

16Seuta hakudaha kwambulwa kwa ukulu wa bunga dya awagomba kondo wakwe,

hegu mkankalu hakuhuda kwa nguvu zakwe zitendese.

17Falasi ya nkondo haikuwagila chintu mwe kupata uhuda,

nguvu zakwe zitendendese hazikudaha kumwambula mntu.

18Zumbe Chohile akaula wadya wakumvikila,

wadya wekiye msuhi wawo mwe ungi wakwe hewine udumo.

19Uyo awambula mwe file,

awasigaza wajima mwe chipindi cha gumbo.

20Suwe chamgoja Zumbe Chohile kwa msuhi.

Uyo ni wambizi wetu na nchinga yetu.

21Heye chelelwa kwachausa chakwe,

china msuhi mwe idizina dyakwe dikukile.

22Ungi wako hewine udumo wikale mwetu, weye Zumbe Chohile,

kwaviya msuhi wetu chiwika kwako.