Ntogozi 32

Kweila na kusizwa masa

1Mbwedo wakwe mntu yudya alekeilwe masa yakwe,

mntu yudya amasa yakwe yauswa.

2Mbwedo mwa yudya mntu Zumbe Chohile hakumwaziza masa,

naho mntu hena mlema mo umoyo wakwe.

3Umo nesinati kutambalisa amasa yangu,

nasibuntika kwa kwilwa msi mjima.

4Msi na chilo kunikantila,

sifyoswa izinguvu zangu,

saviya mnyuzu mwe fukuto.

5Haheza niyo nalavyanya amasa yangu kwako,

naho sifisize wihi wangu.

Sigamba, nanilavyenye uwavu wangu kwa weye Zumbe Chohile,

aho weye niyo wanilekeila amasa yangu yose.

6Elo, chila mntu mkanuni akulombeze weye,

kwaviya wapatikana,

chindedi nkulujumbu ya mazi ikeza,

haimbwile umntu uyo.

7Ni weye nchinga yangu ya kwefisa,

weye wanidima mwe nkunto zangu,

na kunizungulusiza nchemo zo uhuda,

kwachausa cha wambulwa.

8Zumbe Chohile agamba, “Nahuhinye na kukulagisa sila nohinge.

Nahulangilize na kukutunduliya.

9Usekutenda hezi saviya falasi hegu nyumbu hezine akili,

izo zaungwa zitalizwe nila na nkamba,

hegu sivyo hazikusogeile.”

10Mntu mwavu ana nkunto zilozize,

mna ungi wa Zumbe Chohile hewine udumo wamzunguluka akumwikiya msuhi.

11Bwedani na kwelelwa kwa ivyo Zumbe Chohile adamanye!

Chemani nyuwe nyose wachumi wa myoyo.