Ntogozi 31

Lombezo dya msuhi kwa Zumbe Chohile

1Weye Zumbe Chohile, nasumkila ugombezi kwako,

usekunileka ningile soni,

mo ukanuni wako unambule.

2Nitegela gutwi dyako, sunguza wize unambule!

Utende luwe lwa wambizi kwangu,

nchinga itogile ya kunambula.

3Weye wi luwe lwangu na nchinga yangu,

nilongoza na kunidima kwachausa che idizina dyako.

4Nihonya ne imitego wanitegele chinyele,

kwaviye ni weye sumkilo dyangu.

5Iloho yangu naika mwemikono yako,

weye Zumbe Chohile unambule,

weye Zumbe Chohile, Chohile mkanuni.

6Nawehiwa wakuvikila matukulu,

miye namwikiya msuhi Zumbe Chohile.

7Nanitowe nchelejele na kwelelwe kwa ungi wako,

kwaviya weye wawona nkunto zangu,

ulumi mo umoyo wangu kuumanya.

8Weye huninkize mwe imikono ya awankondo wangu,

mna kunichimalisa hantu hatondowale.

9Weye Zumbe Chohile niwonela mbazi, kwaviya nimwe nkunto,

ameso yangu yahwa kwa kwila,

nguvu zinisila mo mwili na mwe loho kwa tumbwaziko.

10Ujima wangu usokela kwa mesozi,

heye, mihilimo yangu kwa kwila kwa ulumi utendese,

nguvu zangu zasila kwachausa cha masa,

hata amavuha yangu yanyuluka.

11Sibelwa ni wankondo wangu wose,

vitendese wadya wehajihi hangu.

Wambuya zangu wanehelwa,

wakaniwona mwe sila wanisumka.

12Sijalwa saviya mntu abanike,

sitenda saviya nyungu itulike.

13Siva wantu watakalisana,

wanitisa chila ntendele,

woga wanizila chila nkanana,

waika myalo wanikome.

14Mna miye msuhi wangu nawika mwako weye Zumbe Chohile uyodu,

nagamba, “Weye wi Chohile ywangu.”

15Wikazi wangu wi mwemikono yako,

unambule mwemikono ya wankondo wangu,

na awo wakunisulumiza.

16Nikaula kwa wedi miye mndima ywako,

nambula kwa mbazi zako.

17Usekunileka ningile soni, Weye Zumbe Chohile,

kwaviya nakulombeza weye,

mna wehi wajelwe soni,

na kwagila kwedibome hedine uhelo wanyamale dwii.

18Nyamaza imilomo ya awantu wakulonga udanti,

wakulonga kwa wefyenyi mwa wakanuni,

kwaviya weduvya ko ubezi.

19Kaula ivyo wili mkulu uwedi wako,

kuwekiya mpamba wadya wakukuvikila,

wakusumkila ugombezi kwako,

wawenka yedi wantu wose wakasinya.

20Weye wawafisa hantu hatondowale aho wili,

hale na mizungu ihiye ya wantu,

wawaika mpeho mwe wamizi wako,

hale na uhigani wa awankondo wawo.

21Atogolwe Zumbe Chohile,

kwaviya kanilagisa ungi wakwe ukwehela,

umo nendile sitandamwa ni wankondo.

22Miye nasogoha na kufanyanya kugamba kunidula,

kumbe kwiva indilo yangu umo hakwitanga unambize.

23Mungeni Zumbe Chohile, nyuwe wakuka wakwe wose,

Zumbe Chohile awadima wantu wakanuni,

mna awakantila vikuwagila wakweduvya.

24Mtende wakankalu na kudindimala,

nyuwe nyose mkumwikiya msuhi Zumbe Chohile.