Ntogozi 22

Ndilo yo usungu na nchemo ya ntogozi

1Chohile ywangu, Chohile ywangu, ni mbwani kunasa?

Ni mbwani wi hale na miye chani udahe kunambiza?

Wihale na indilo yangu.

2Weye Chohile ywangu, naila nomsi mna hukunihitula,

nechilo naguta mna sikupata luhulwila.

3Hataivyo weye wi Mkuka ukwikala mwe ichigoda cho Uzumbe,

ukulongoza na kutogolwa ni wantu wa Izulaeli.

4Wadalahala wetu waikaga msuhi kwako,

weye niyo wawambula.

5Wakwilila weye niyo wawambula,

waika msuhi kwako niyo hawengile soni.

6Mna miye sina yombe,

sihufywa na kubelwa ni wantu.

7Wose wakuniwona wanitila,

wanijela mishu na kusingisa imitwi yawo.

8Wagamba, “Nakamwikiya msuhi Zumbe Chohile,

elo hegu Zumbe Chohile amuwagila namwambule.”

Uneva Zumbe Chohile amuwagila namwambule,

elo namwambule.

9Mna ni weye unilavize mwe inda ya mame,

kunika mpeho umo nichei katiti honka amatombo ya mame.

10Sikwikiya msuhi weye kukongela ukwelekwa kwangu,

kukongela kwe inda ya mame kutenda Chohile ywangu.

11Usekutenda hale na miye,

kwaviya nkunto ihaguhi

naho hahana ywa kunambiza.

12Wankondo walozize wanizunguluka saviya njeku,

wanitandama saviya njeku nkali za Bashani.

13Saviya simba zikubuma zikatatavula maingo,

zigubula imilomo yawo chani zinebunge miye.

14Sijuluzwa saviya mazi,

mavuha yangu yose yafosa mwe ivitago vyakwe.

Moyo wangu uhituka utenda nta,

ulujuka mndani mwangu.

15Nguvu zangu zinyala saviya zae,

lulimi lwangu lutozana no ujeje lo umlomo wangu,

kwaviya kunasa mwe lumbi dya file.

16Sizungulukwa ni bunga dya makuli,

bunga dya wehi dinitandama,

wanigwila imikono ne iviga.

17Sisigala mavuha ayodu,

wankondo wangu wanisinya na kuntila.

18Wasangilana izisuche zangu wenye kwa wenye,

na kutoila tegatega inkazu yangu.

19Mna weye, weye Zumbe Chohile usekwikala hale na miye,

weye wi nguvu zangu sunguza wize unambize.

20Honya uwikazi wangu kulawana na bamba,

ambula uwikazi wangu mwa amakombe ya amakuli ayo.

21Nambula kulawa mwe mlomo wa simba,

nambula kulawa mwe mahembe ye izimbogo izo,

kuhitula idilombezo dyangu.

22Naniwatamwile walukolo wangu izintendwa zako,

nahutogole weye mwe imidugano yawo.

23Mtogoleni Zumbe Chohile nyuwe nyose mkumvikila!

Nyuwe welekwa wose wa Yakobo mtunyeni.

Mvikileni Chohile nyuwe welekwa wose wa Izulaeli.

24Kwaviya uyo hahufise hegu kubela masulumizo ya akuzilwa,

naho hakwefisa uso wakwe,

mna amwetegeleza indilo yakwe vileke amwambize.

25Kwachausa chako nahutunye mwe midugano mikulu ya wantu,

nanichintize nazili zangu kulongozi kwa wadya wakukuvikila weye.

26Wachiwa nawadye na kwiguta,

wadya wakumlonda Zumbe Chohile nawamtogole!

Chohile awenkeni ujima mwikale mazuwa yose.

27Uhelo wose we isi naukumbuke na kumhitukila Zumbe Chohile,

na amakabila yose mwe izinkolo zose za awantu we izisi ntuhu nawamwetegeleze.

28Kwaviye Zumbe Chohile ni seuta,

uyo alongoza mwe izisi.

29Wata ugoli wose mwe isi nawafike madi kulongozi kwakwe,

wose wakubanika nawafike madi kulongozi kwakwe,

hamwenga na wadya hewekudaha kutunduliya ujima wawo.

30Cheleko nachimsankanile uyo,

vyeleko navigambilwe izimbuli atendile Zumbe Chohile,

31nawatambalise ntendwa zakwe za wambula.

Wantu hewenati nawagambilwe ntendwa zakwe za wambula,

kwaviya Zumbe Chohile nuyo adamanye ivyo.