Ntogozi 21

Ntogozi kwa chausa cha kupata uhuda

1Weye Zumbe Chohile, seuta abweda izinguvu zako.

Abwedesa kwa uhuda ukumwinka.

2Kumwinka viya akunga mo umoyo wakwe,

naho huchindile idilombezo dyakwe.

3Kumgoneka na kumjimbika kwa ujimbiko mkulu,

na kumvisa chilemba cha zahabu ntana mo mtwi wakwe.

4Nakakulombeza ujima weye niyo wamwinka,

kumwinka ujima mtali hewine udumo.

5Kwa wambizi wako umwinkile katenda mkulu,

kwaviya kumwinka kutogolwa na ntunyo.

6Wamwinka ujimbiko wako mazuwa yose,

wambwedeza kwa uwiyaho wako.

7Kwaviya seuta kaika msuhi wakwe kwa Zumbe Chohile,

kwa ungi mkulu wa Zumbe Chohile natende mpeho.

8Mkono wako nauwagwile awankondo wakwe wose,

mkono wako wa kulume naumgwile wose wakukwihiwa.

9Umo ukeza nowakome saviya tanuli dya moto.

Zumbe Chohile nawabinde kwa amaya yakwe.

10Nowakome awelekwa wawo kulawa mwe isi,

lweleko lwawo halusigale mwa awantu we isi.

11Hata hegu nawakwekambile yehiye na kutunga mizungu ihiye, hawadahe kuchumilwa mpwii.

12Kwaviya weye nowataile mifulo kulawa mo uta wako,

nowatimulaganye kwa nguluko.

13Weye Zumbe Chohile utunywe kwachausa che izinguvu zako!

Nachicheme na kutogola izinguvu zako.