Ntogozi 20

Kulombeza uhuda

1Zumbe Chohile akuhitula umo ukatenda mwe nkunto,

zina dya Chohile ywa Yakobo ditende nchinga yako.

2Akutumile wambizi kulawa mwe Inyumba yakwe,

akwambize kulawa kolugulu lwa Sayuni.

3Akumbuke amalavyo yako yose,

azumile ntambiko zako zose zo kutikimya.

4Akwinke viya ukunga mo umoyo wako,

achumize imizungu yako yose.

5Nachitowe nchelegele kwa mbwedo kwachausa cho uhuda wako,

nachinule bendela zetu kwa zina dya Chohile ywetu.

Zumbe Chohile nakwinke viya vyose ukunga.

6Haluse simanya kugamba Zumbe Chohile namwambize seuta asagule,

namhitule kulawa hakukile hakwe kwembingu,

kwa mkono wakwe wa kulume namwinke uhuda mkulu.

7Watuhu weduvila malingisha ya nkondo,

watuhu falasi,

mna suwe cheduvila zina dya Zumbe Chohile, Chohile ywetu.

8Awo nawekobadike na kugwa hasi, mna suwe chenuka na kuchima chigunge.

9Weye Zumbe Chohile, mwinke uhuda seuta! Umo chikakwitanga chihitule.