Ntogozi 19

Ukulu wa Chohile mo kuumba

1Imbingu yatambalisa ukulu wa Chohile,

ulanga wabunkula ndima ye imikono yakwe.

2Msi waugambila mbuli msi ukutimila,

chilo chagambila chilo chikwiza.

3Hahana ulongi hegu milosi yakujeseza,

naho hahana izwi dikwivika,

4mna izwi dyawo dizagala mwe isi yose,

milosi yawo yenela kubula uhelo we isi.

Chohile kaika wikazi wa zuwa ko ulanga,

5idyo dyasomwela saviya msozi akufosa kwe ichumba chakwe,

dyelelwa saviya mkankalu dyelelwa kutimila isila yakwe.

6Dyasomwela ntendele imwenga ye imbingu na mzunguluko wakwe kubula ntendele ntuhu,

hahana chikudaha kwenega ifukuto yakwe.

Sigilizi ya Zumbe Chohile

7Sigilizi ya Zumbe Chohile ichinta,

yamwinka mntu ujima mhya,

imiko ya Zumbe Chohile ichuma,

yamwinka ubala mntu mhezi.

8Malagizo ya Zumbe Chohile yawagila,

ayo yabwedeza moyo,

imiko ya Zumbe Chohile yalangaza, yadahiza meso kuwona.

9Kumogoha Zumbe ni mbuli yedi,

uko kwekala mazuwa yose.

Imiko ya Zumbe Chohile ni ya chindedi,

naho yose yawagila vitendese.

10Ina yombe kulu kujinka zahabu,

kujinka zahabu ntana vitendese.

Ina mwile kujinka uchi,

kujinka uchi kulawa mwe chivuna.

11Izo yanihinya miye mndima ywako,

ukazitimila wenkigwa jeleko kulu.

12Ni yuhi akudaha kubunkula ubanasi wakwe?

Weye Zumbe Chohile, nilekeila wavu wangu siumanyize.

13Nidima miye mndima ywako na masa ya kasidi,

ayo yasekunilongoza.

Aho nanitende sichuma, Weye Zumbe Chohile,

sina mlema hegu ubanasi mkulu. 14Milosi yo umlomo wangu ne izifanyanyi zo umoyo wangu,

vipate kuzumilwa kulongozi kwako, weye Zumbe Chohile, Weye Zumbe Chohile, luwe lwangu na mwambula ywangu.