Ntogozi 18

Nchemo yo uhuda

1Nakunga weye Zumbe Chohile,

weye wi nguvu yangu.

2Zumbe Chohile ni luwe lwangu,

nchinga yangu na wambulwa ywangu,

Chohile ni luwe, uyo kwakwe nasumkila.

Uyo ni nchinga na mpembe yangu ya wambulwa

na nchinga yangu.

3Namwitanga Zumbe Chohile akuwagila ntogozi anambize,

miye nanambule kulawa kwa awankondo wangu.

4Mabwehwelo yakwigala file yanimela,

nkulujumbu yo ukomi nainebunga,

5sigi za file zinizunguluka,

na mitego ya file nainigwila.

6Mwe nkunto zangu simwitanga Zumbe Chohile, simwilila Chohile ywangu anambize.

Kulawa mwe Inyumba yakwe keva idizwi dyangu dyo kulombeza wambizi,

ndilo yangu ibula mwa amagutwi yakwe.

7Vikaheza isi niyo yazingiza na kusingisika,

vyegamo vya amagulu viyuganika,

vizingiza kwaviya Chohile nendile kehiwa.

8Mosi ulawa mwe izimpula zakwe,

moto ukutikimya ulawa mo mlomo wakwe,

makala ya moto yalawa mwakwe.

9Katula imbingu niyo asela hasi,

maingu matitu nendile ye hasi he iviga vyakwe.

10Kakwela chumbe china mawawa chikwitangwa kelubi,

kapuluka kulanga kwa mawawa ya nkung'unto.

11Kezungulusiza chiza ntendele zose,

maingu yazamile yamemile mazi yamzunguluka.

12Lumwemwe lumulika kulongozi kwakwe,

niyo kwalawa maingu ya fula ya mayuwe na makala ya moto. 13Zumbe Chohile kabuma kulawa kwembingu,

izwi dya Uyo Mkulu Vitendese divika.

14Kalasa imifulo yakwe na kuwatimulaganya awankondo wakwe,

heye, kawabalaza kwa lumwemwe lwa mbaula.

15Mzumilizo we ibahali ugubulwa,

vyegamo vye isi niyo vyawoneka.

Kwachausa cha izwi dyako dya kugomba nkondo,

kwa muye wa makala ya moto ukulawa mwe izimpula zako. 16Zumbe Chohile kachulusa umkono wakwe kulawa kulanga niyo aniguha,

kanitoza na kunivulula mwe mazi yalozize.

17Kanambula kulawa mwa awankondo wangu wata nguvu zitendese,

kanambula kwa wadya wakuniihiwa,

kulawa mwe wankondo wangu wata nguvu zitendese kujinka miye.

18Awo wanebungaga umo nendile mwe nkunto,

mna Zumbe Chohile endaga wambizi wangu.

19Kanileta na kunika hantu hatondowale,

niyo anambula kwaviya kawagilwa ni miye.

20Zumbe Chohile kanidamanyiza vikuligana no uchumi wangu,

kaninka jeleko kwaviya mikono yangu haina lema.

21Kwaviya sitimila izisila za Zumbe Chohile,

sidamanye wavu hamleka Chohile ywangu.

22Sitoza amalagizo yakwe yose,

silekile kutimila imiko yakwe yose.

23Sitendile na mlema kulongozi kwakwe,

miye sedima nisekukola masa.

24Zumbe Chohile kaniliha kuligana no uchumi wangu, uyo kamanya kugamba mikono yangu haikoile masa.

25Weye Zumbe Chohile wimkanuni welagisa kwa wakanuni,

kwa hene lema welagisa huna lema.

26Kwa wadya wachumile welagisa kuchuma,

mna kwa yudya mwavu weye watenda unyakwili.

27Weye wawambula wakunyanyahala,

mna wawaseleza wakweduvya.

28Weye Zumbe Chohile wanilangaziza,

wabalaza chiza kulongozi kwangu,

weye Zumbe Chohile, Chohile ywangu.

29Kwa wambizi wako nahuda fyoo,

weye Chohile waninka nguvu za kuhuda mpingamizi.

30Yuno Chohile ntendwa zakwe zichuma.

Ulosi wa Zumbe Chohile uchuma,

uyo ni nchinga kwa wose wakusumkila kwakwe.

31Kwaviya ni Chohile yuhi ukaleka Zumbe Chohile?

Ni luwe luhi lwa kusumkila kwegombela ukaleka Chohile ywetu?

32Zumbe Chohile nuyo akuninka nguvu,

nuyo akudima isila yangu. 33Viga vyangu kavitogeza saviya viga vya kapala,

anidahiza kuchimala ko lunenengwe.

34Ahinya imikono yangu kugomba nkondo,

imikono yangu yadaha kuhinda uta wa shaba.

35Kuninka nchinga yako ya kwedima,

mkono wako wa kulume wanegamiza,

ukunyanyahala kwako kunitenda nitende mkulu. 36Kwangamula isila yangu,

vileke viga vyangu visekutela.

37Siwagwa mnyuma awankondo wangu niyo nawabwila,

siwiye kunyuma kubula siwakomwa.

38Siwatowa niyo wagwa hasi vyaleka wadunduga kwinuka vituhu,

wagwa hasi he iviga vyangu.

39Kuninka nguvu za kugomba nkondo,

kuwatenda awankondo wangu wafike madi he iviga vyangu.

40Kuwatenda awankondo wangu wahituke na kusumka,

wadya wose wanihiwe siwakoma.

41Waguta lukunga walombeze wambizi,

mna hahendaga na mndosa ywa kuwambula,

wamwilila Zumbe mna hawalandule.

42Siwahonda niyo watenda saviya lumbi dikufiliswa ni mpeho,

siwajatangila saviya ntagata mwesila.

43Kunambula kulawana na kwebungwa ni wantu wavu,

kunitenda chilongozi ywa wantu wa si ntuhu,

wantu samanyaga wanisankanila.

44Ahadya weze weve uhuda wangu niyo wazitimila,

wajeni wayanyahala kulongozi kwangu,

45wajeni wose watigintika, wafosa wasa izingome zawo wakazingiza.

46Zumbe Chohile ni mjima! Atogolwe Luwe lwangu!

Atogolwe Chohile Mwambula ywangu.

47Uyo nuyo Chohile,

awanyanyahaza wantu we izisi ntuhu,

hasi hangu. 48Kanambula kulawa kwa awankondo wangu,

kaninka uhuda mwa awo wakunihiga, kanambula kulawa mwe wantu manyakwili.

49Elo, nahutogole mwa awantu we izisi ntuhu,

weye Zumbe Chohile nanidichemele ntogozi idizina dyako.

50Chohile amwinka seuta ywakwe uhuda mkulu,

alagisa mbazi kwa uyo asagule,

amlagisa mbazi Daudi na awelekwa wakwe mazuwa yose.