Ntogozi 17

Lombezo dya mntu hene mlema

1Weye Zumbe Chohile, iva ukweila kwangu ko uwagila wive indilo yangu,

tegela gutwi idilombezo dyangu,

hadikulawa mwe milomo yo udanti. 2Nkato yangu na ilawe kwako,

kwaviya weye kumanya mbuli ikuwagila.

3Weye kumanyanyisa umoyo wangu,

kunizila nechilo na kunizuza, kunijezesa,

na huwone wavu mndani mwangu,

kwaviya silongile chintu chochose hechikuwagila.

4Mwe ntendwa zikudamanywa ni wantu,

miye sitimila amalagizo yako senega sila za wantu wavu.

5Mazuwa yose sitimila isila yako,

naho siteile mpwii.

6Nakwitanga weye Chohile,

kwaviya wanihitula, unitegele idigutwi dyako wive idilombezo dyangu.

7Lagisa ntendwa zako nkulu zikwehela,

weye ukwambula kulawa kwa awankondo wawo,

wadya wakusumkila kwegombela kwako.

8Unidime saviya mboni ye idiziso dyako,

unifise hasi hechizuli cha amawawa yako,

9kulawa mwe wavu wakunebunga,

kulawa mwe wankondo wakomi wanitandame.

10Awo hawana mbazi zozose mwe myoyo,

milomo yawo imema milosi ya kweduvya.

11Wanitimila na kunizunguluka,

haluse wanitandama, waninyatila wanigwise hasi.

12Wemalanya kale saviya simba chani wanitatavule,

wesaviya mwana simba akongola.

13Inuka weye Zumbe Chohile, higana nawo uwagwise,

nambula mwa watu wavu kwa bamba dyako.

14Weye Zumbe kwa mkono wako,

unambule mgati mwa awantu awo,

wakungisa vintu vya muno mwe isi.

Wamemeze ugoli wakuubesa,

uwo wakuwasiza awana wawo,

na ukusigala wawasiza awezukulu wawo.

15Kwaviya miye ni mkanuni naniwone uso wako,

henuka nanelelwe hawona uso wako.