Ntogozi 16

Kulombeza kwikala mpeho

1Weye Zumbe Chohile unidime,

kwaviya nasumkila ugombezi kwako.

2Namgamba Zumbe Chohile, “Weye ni weye Zumbe Chohile ywangu,

weye hwihali sina mbuli yoyose yedi.”

3Wakuka we muno mwe isi nawo wakuwagila vitendese,

kwikala nawo nicho ichinyemi changu chikulise.

4Mna wakuvikila milugu mituhu nawapate masulumizo yalozize.

Ntambiko zawo za sakame sanizijuluze,

hegu kutaja amazina ye imilungu yawo.

5Weye Zumbe Chohile kunikiya chila chintu,

naho kuninka viya hunga,

mbuli zangu zose kuzichumiza.

6Kunihimila muntu mtana vitendese,

chindedi ulisi wangu wawagila.

7Namtogola Zumbe Chohile akunilongoza,

hata nechilo untu wangu wanihinya.

8Namwika Zumbe kulongozi kwangu mazuwa yose.

Kwaviya entendele yo mkono wangu wa kulume, sanisingisike.

9Elo, moyo wangu welelwa,

no lulimi lwangu lwamtoila luchelejele,

iviya miye nanikale mpeho,

10kwaviya honase kwedibome hedine uhelo,

naho honileke miye mkuka ywako niwone ubanasi.

11Kunilagisa sila yo ujima,

nonimemeze chinyemi mo wiyaho wako,

hamwenga na mbwedo wa mazuwa yose.