Ntogozi 148

Wantu wose wamtogole Chohile

1Mtogoleni Zumbe Chohile!

Mtogoleni Zumbe Chohile kulawa kwembingu,

mtogoleni nyuwe mkwikala kulanga.

2Mtogoleni nyuwe wandima wakwe wose wa kwembingu,

mtogole uyo, nyuwe wose vyumbe vya kwembingu.

3Mtogoleni uyo, nyuwe zuwa na mnenge, mtogoleni uyo,

nyuwe ntondo zose zikung'ala.

4Mtogoleni uyo, nyuwe mbingu zikulanga vitendese,

na nyuwe mazi mlanga mo ulanga.

5Viditogole idizina dya Zumbe Chohile,

kwaviya alagizaga vyose niyo vyaumbwa,

6kwa lagizo dyakwe kaika ivintu vyose hantu hakwe kale na kale,

kalavya lagizo hadikuhitukila kale na kale.

7Mtogoleni Zumbe Chohile, kulawa mwe isi,

nyuwe vyumbe vikulu mwe bahali ne imizumilizo yose ye ibahali,

8lumwemwe lwa mbaula na fula ya mayuwe,

balafu na maingu,

na nkung'unto vyachintiza malagizo yakwe,

9mtogoleni Zumbe Chohile, nyuwe nyose wagulu na magulu,

miti ya ntunda na mielezi yose,

10wanyama wose wa kumbago na wakudimwa,

wakubuluzika na wadege wakupuluka,

11mtogole uyo, seuta ywe isi na wantu wose,

masekulu na wakulu wose,

12wabwanga na wandele, wadalahala na wana.

13Wantu wose waditogole idizina dya Zumbe Chohile,

kwaviya zina dyakwe ichedu dikulisa,

Ukulu wakwe wi mlanga mwe isi na kwembingu.

14Kawenka uhuda awantu wakwe,

elo wantu wakwe wose wamtogoleni,

wana wa Izulaeli wantu we hajihi naye.

Mtogoleni Zumbe Chohile!