Ntogozi 147

Kumtogola Chohile Mta Nguvu Zose

1Mtogoleni Zumbe Chohile!

Kwaviya ni vyedi,

kumchemela ntogozi Chohile ywetu,

kwaviya ni mta mbazi naho awagila kuchemelwa ntogozi.

2Zumbe Chohile nuyo akuuzenga umzi wa Yelusalemu,

naho awachisanya Waizulaeli wamwaganikane.

3Ahonya wafile chevu,

na kufunga izinkwenje zawo.

4Awaza izintondo,

na kuzinka mazina zose.

5Zumbe ywetu ni mkulu naho ni mta udahi utendese,

umanyi wakwe haukuhimika.

6Zumbe Chohile awadahiza wata kunyanyahala,

mna wakweduvya awadula hasi.

7Mchemeleni Zumbe Chohile kwa kumhongeza,

mchemeleni Chohile ywetu kwa magunda.

8Uyo agubika imbingu kwa maingu,

anyesa fula mwe isanga,

na kutenda mani yahote mwa awagulu.

9Awenka nkande wanyama,

naho ayenka nkande machinda ya kungulu yakaila sala.

10Chinyemi chakwe hachimwe nguvu za falasi,

iviya chinyemi chakwe hachimwe ukankalu wa wagomba nkondo,

11mna awagilwa ni wadya wakumvikila,

wadya wakwika msuhi wawo mo ungi wakwe hewine udumo.

12Mtogole Zumbe Chohile weye Yelusalemu!

Mtogole Chohile ywako weye Sayuni!

13Kwaviya katogeza imihindo ye izinchili zako,

naho awajimbika awantu wakwikala umo mndani.

14Nuyo akwika utondowazi mwe imihaka yako,

naho akwigusa kwa ngano yedi.

15Atuma ulosi wakwe mwe isi,

chiya akulonga chasunguza kudamanywa.

16Atanda balafu saviya sufi,

amwaganisa mnyuzu saviya maivu.

17Anyesa fula ya mayuwe saviya mpalamba,

hahana akudaha kujijimiza umpeho wakwe.

18Atuma lagizo dyakwe balafu yalujuka,

avumiza nkung'unto, mazi yaguluka.

19Amgambila Yakobo ulosi wakwe,

amwinka Izulaeli malagizo ne izisigilizi zakwe.

20Hatendile mbuli seizo kwa wantu wowose mwe izisi ntuhu,

izinkanto zakwe hawazimanyize.

Mtogoleni Zumbe Chohile.