Ntogozi 146

Kumtogola Chohile Mwambula

1Mtogoleni Zumbe Chohile!

Miye nanimtogole Zumbe Chohile!

2Nanimtogole Zumbe Chohile mo wikazi wangu wose,

nanimchemele ntogozi Zumbe Chohile ywangu wikazi wangu wose.

3Usekwika msuhi wako kwa masekulu,

kwaviya ni wantu wakubanika,

awo hawakudaha kukwambula.

4Umo wakabanika wahituka msanga,

idizuwa idyo mizungu yawo yose yaduma.

5Ujimbiko ni kwa wadya wose wambizi wawo ni Chohile ywa Yakobo,

wadya msuhi wawo wimwa Zumbe Chohile, Chohile ywawo,

6Mumbi ywe imbingu ne isi ne ibahali na vyose vimndani mwakwe,

Zumbe Chohile ni mkanuni kale na kale.

7Uyo awenka uwagila wadya wabunyanywe,

naho awenka nkande wata sala.

8Zumbe Chohile awadahiza matuntu wadahe kuwona,

Zumbe Chohile awenula wazamilwe ni mizigo,

Zumbe Chohila awaunga wata uwagila.

9Zumbe Chohile adima wajeni wakwikala mwe isi yetu,

awambiza wabanikilwe ni wagosi wawo na wabanikilwe ni watati zawo,

mna abalanga izisila za wantu wavu.

10Zumbe Chohile ni seuta kale na kale,

Chohile ywako weye Sayuni, vyeleko vyose.

Mtogoleni Zumbe Chohile!