Ntogozi 145

Ukulu na wedi wa Chohile

1Nahutogole weye Chohile ywangu na seuta ywangu,

nahutunye kale na kale.

2Chila zuwa nahutogole,

na kudikutunya idizina dyako kale na kale.

3Zumbe Chohile ni mkulu naho awagila kutogoleswa,

ukulu wakwe haukuhimika.

4Cheleko chimwenga nachitogole izindima zako kwa cheleko chituhu,

nawatamwile ntendwa zako nkulu.

5Nawalonge ung'azi wo ugoli wo ukulu wako,

nanifanyanye mwe izindima zako zikwehela.

6Wantu nawatamwile udahi we izindima zako zikutisa,

miye nanitambalise ntendwa zako nkulu.

7Wantu nawatambalise ntogozi zako wakakumbuka uwedi wako utendese,

naho nawacheme kwa chinyemi mo uwagila wako.

8Zumbe Chohile ni mta mbazi na kulekeila,

hakusunguza kwihiwa, kamema ungi.

9Zumbe Chohile ni ywedi kwa wose,

naho ana mbazi kwa chila chintu adamanye.

10Zumbe Chohile, vyose uvyumbile navikutogole,

wakuka wako nawakuhongeze.

11Nawatamwile ung'azi wo useuta wako,

na kutambalisa ukulu wako,

12vileke wantu wose wamanye ntendwa zako nkulu,

no ung'azi wo useuta wako.

13Useuta wako ni useuta wa kale na kale,

udahi wako wekela vyeleko vyose.

Zumbe Chohile ni mkanuni mo ulosi wakwe,

ni mta ungi kwa chila chintu adamaye.

14Zumbe Chohile awadahiza wose wata nkunto,

na kuwenula wadya wagwele.

15Meso ya vyumbwa vyose yasinya wenye,

weye wavinka nkande zawo mwe ichipindi chakwe.

16Wakunjula mkono wavinka nkande vintu vyose vina ujima,

wachintiza chila chikungwa ni chila china ujima.

17Zumbe Chohile awagila mwe izisila zakwe zose,

naho ni mkanuni mwe chila chintu adamanye.

18Zumbe Chohile ehajihi na wadya wose wakumwitanga,

wose wakumwitanga kwa ukanuni.

19Uyo enkiza chila chintu chikungwa mwe wadya wakumtunya,

eva indilo yawo na kuwambula.

20Zumbe Chohile awamila wose wakumunga,

mna wavu wose nawakome.

21Mazuwa yose nanimtogole Zumbe Chohile.

Chila chumbe aumbile, chitogole idizina dyakwe dikukile kale na kale.