Ntogozi 144

Ntogozi kwa Chohile kwa uhuda

1Ajimbikwe Zumbe Chohile, mwamizi ywangu.

Akuihinya imikono yangu nkondo,

akuhinya awadole wangu kutowana,

2uyo ni mwamizi ywangu, uyo ni ngome naho ni mwambula ywangu,

nchinga yangu hugulukila,

uyo awanyanyahaza wantu we izisi ntuhu hasi he iviga vyangu.

3Zumbe Chohile, mntu ni chintu chani vikuleka umtunduliye,

mwili ni chintu chani vikuleka waufanyanya?

4Mntu ni saviya muye du,

mazuwa yakwe yenga chizuli chikujinka.

5Zumbe Chohile, tula izimbingu zako usele hasi,

donta amagulu vileke yalavye mosi.

6Mulika lumwemwe lwa mbaula uwatimulaganye awankondo wako,

taila mifulo yako uwabalaze.

7Chulusa mkono wako kulawa kulanga,

nikombola na kunambula mwe mazi matali,

kulawa mwe nguvu za wajeni,

8awo walonga udanti,

wachulusa mikono wehebwanta lulimi.

9Zumbe Chohile, nahuchemele nchemo mpya,

nanitowe limba dina nyuzi mlongo umo hakuchemela,

10weye wawenka maseuta wambula,

na kumwambula mndima ywakwe Daudi mwe bamba dya file.

11Nikombola na kunambula mwe mikono ya wajeni,

awo wamemile udanti mwe imilomo yawo,

mikono yawo yatambalisa udanti.

12Wabwanga wetu mo ubwanga wawo,

nawatende saviya mimeya itunduliwe vyedi,

wachiche wetu watende saviya nguzo,

zizilingwe kuhamba idizumba dya seuta.

13Magulu yetu yameme ulozo wa chila namna.

Ngoto zetu kwezinkonde nazeleke milongo na maelufu.

14Ludimo lwetu nalubuluze mizigo izamise.

Iviwambaza havibogozoke,

hakutende na kutahigwa,

hegu ndilo ya nkunto mwe izisila zetu.

15Chinyemi ni cha wantu we seivyo,

ujimbiko wimwe wadya Zumbe ni Chohile ywawo.