Ntogozi 143

Lombeza wambizi

1Zumbe Chohile wive lombezo dyangu!

Kwaviya weye wawagila,

naho wimkanuni soo unambize.

2Usekunikantila miye mndima ywako,

kwaviya hahana mta ujima akuwagila kulongozi kwako.

3Wankondo wangu wanitimila, wanigwisa hasi,

wanitenda nikale mwe chiza saviya wantu wabanike chikale.

4Loho yangu ifa chevu vitendese,

moyo wangu ufanene kwa woga.

5Nakumbuka mazuwa ye chikale,

nafanyanya mwe izindima zako zose,

nasungulumanya ndima zidamanywe ni imikono yako.

6Nachulusa imikono yangu kwako kuno nalombeza,

nna nchilu, saviya sanga inyalise.

7Zumbe Chohile, sunguza nihitula!

Sihwelesa usekunefisiza,

hegu sivyo nanitende sawadya wakusela kwa wabanike.

8Elo, mtondo nigaila ulosi wa ungi wako hewine udumo,

kwaviya msuhi wangu siwika kwako.

Lombezo dyangu nadionyekeza kwako,

nilagisa sila yakujinkila,

kwaviya sikwikiya msuhi weye.

9Zumbe Chohile unambule mwe wankondo wangu,

kwaviya sisumkila kwako.

10Nihinya nitende viya ukunga nitende,

kwaviya weye wi Chohile ywangu,

loho yako yedi inilongoze mwesi ideleke.

11Zumbe Chohile, kwachausa che idizina dyako,

nambula ujima wangu,

kwa uwagila wako, nilavya mwe nkunto.

12Kwachausa cho ungi wako kwangu,

wakome awankondo wangu,

wabalange wose wakunisulumiza,

kwaviya miye ni mndima ywako.