Ntogozi 141

Lombezo dya chisingi

1Zumbe Chohile nakwitanga weye, sunguza wize kwangu unambize.

Wive idizwi dyangu umo hakwitanga.

2Lombezo dyangu dibule kwako saviya ufumba,

kwinula mikono yangu kulanga kutende saviya ntambiko ya chisingi.

3Zumbe Chohile, ika mwamizi mo umlomo wangu,

dima imilomo yangu.

4Usekuuwonyekeza umoyo wangu kwe mbuli ihiye,

nnasekuzwela ntendwa zihiye,

hamwenga na wantu wakudamanya wihi,

naho nsekudya nkande ze izingasu zawo.

5Mntu mta uwagila anitowe kwa ungi,

anilangilize kwa kunikwahila, ni mavuta mo mtwi wangu,

mtwi wangu hauilemele,

hata ivyo malombezo yangu mazuwa yose yahigana na wakutenda wavu.

6Umo masekulu wawo wakadulwa hasi kulawa mwe izinyuwe,

wantu wavu nawamanye kugamba milosi yangu yendaga ya chindedi.

7Saviya nkuni zisabantulwe mwe isanga,

nivyo amavuha yetu yamwaganiswe mwe mlomo wa mbila.

8Mna miye nakukaula weye Zumbe, Chohile ywangu,

sisumkila kwako, usekunileka nibanike.

9Unidime mwe imitego wanitegele,

unenegeze mwa amatasi ya wantu awavu.

10Wantu wehi wagwizwe mwe imitego yawo wenye,

umo miye hajinka unenegeze.