Ntogozi 139

Chohile kamanya mbuli zose

1Zumbe Chohile, kunizuza na kunimanya chila chintu.

2Kumanya chila mbuli hudamanya,

kumanya izifanyanyi zangu kulawa hale.

3Waniwona hajenda hegu hagona,

kumanya izisila zangu zose.

4Hata sinati kulonga mbuli yoyose,

weye Zumbe Chohile kumanya chiya hunga nilonge.

5Wi chila ntendele yangu, kulongozi na kunyuma,

wanamila kwa udahi wako.

6Umanyi wako ukulisa kwangu,

ukulisa sikudaha kuumanya.

7Nisumkile kuhi uko hwikuli?

Nite kuhi uko sahubwile?

8Uneva hakwela kulanga kwembingu, weye wiyuko,

hasela hasi kwa wabanike, weye wiyuko.

9Uneva nnakwela kubula ulailo wa zuwa,

hata hekala uhelo we bahali,

10hata uko wiyuko unilongoze,

mkono wako wa kulume wanegamiza.

11Hegu nachigambile chiza chinigubike,

hegu ulangazi unizunguluke utende chilo,

12kwako chiza sicho chiza, chilo nachilangaze saviya msi,

kwaviya chiza nisaviya ulangazi kwako.

13Kwaviya niweye unumbile ivitago vya mndani,

kunilungamanya mwe inda ya mnala.

14Nakutogola kwaviya sumbwa vikwehela na vya maula,

ntendwa zako ni za kwehela,

miye sivimanya ivyo,

15Mavuha yangu hayefisize kulongozi kwako,

umo haumbwa mwe inda ya mnala,

umo halungamanywa mwe inda ya mnala,

hakula chinyele weye nakuvimanya kugamba niyaho.

16Weye kuniwona nichei sinati kwelekwa,

mazuwa yo ujima wangu wose unipangile kuyawandika mwechitabu chako,

umo hedinati kutendeka hata zuwa dimwenga.

17Zumbe Chohile, fanyanyi zako ni nkulu vitendese,

hazikudahika kuwazika.

18Hegu naziwazize naziloza kujinka msanga.

Henuka nichei hamwenga na weye.

19Zumbe Chohile, najelejeza wantu wavu wakomwe!

Nahaungisa wakomi wahalawe hangu!

20Walonga mbuli zihiye kukulanga weye,

walonga wihi kulanga idizina dyako.

21Zumbe Chohile, nisekuweihiwa wadya wakukwihiwa weye?

Nisekuwonela maya wadya wakukuhituka?

22Naweihiwa vitendese awo wakukwiihiwa,

nawawona ni wankondo wangu.

23Zumbe Chohile, nizuza umanye umoyo wangu,

nihima umanye izifanyanyi zangu.

24Ukaule mndani mwangu uneva ulujendo lwanga lwiha,

unilongoze mwe sila yo ujima wa kale na kale.