Zigua Bible Version
Ntogozi 121
Chohile ni mwamizi ywetu
Nikaule kulanga kwa amagulu,
wambizi wangu naulawe kuhi?
Wambizi wangu walawa kwa Zumbe Chohile,
Mumbi ywe imbingu ne isi.
Hakuleke ugwe,
mwamizi ywako hakusinka.
Mwamizi ywa Izulaeli,
hakusinka hegu kugona.
Zumbe Chohile ni mwamizi ywako,
entendele yako ya kulume kukwamila.
Zuwa hadikoke nomsi,
hegu mnenge haukulumize nechilo.
Zumbe Chohile nakuchinde na chila wihi,
namile uwikazi wako.
Zumbe Chohile nakwamile ukengila na ukafosa,
kukongela haluse na kale na kale.
Zigua Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.