Ntogozi 119

Sigilizi ya Zumbe Chohile

1Wajimbikwa wadya wose wachumile mo uluijendo lwawo,

wakujenda kwa kutimila sigilizi ya Zumbe Chohile.

2Wajimbikwa wadya wakutimila imiko yakwe,

wakumlonda kwa myoyo yawo yose,

3awo hewekudamanya mbuli yoyose ihiye,

wakutimila viya akunga Chohile.

4Zumbe Chohile kuchinka sigilizi zako,

vileke chizitimile kwa ukanuni.

5Nahaunga ulujendo lwangu lwachumile,

mwe kutimila amalagizo yako!

6Uneva nnatoza amalagizo yako yose,

sanijelwe soni.

7Nahutogole kwa moyo uchumile,

umo hahina imiko yako yose yo uwagila.

8Nanimile amalagizo yako,

usekujeza kunasa!

Kutimila sigilizi ya Zumbe

9Mbwanga natunduliye uwikazi wakwe kutenda wedi?

Kwa kuiyalongoza kuligana no ulosi wako.

10Nahikiliza kunyanyahala kwa moyo wose,

usekunile nihituke amalagizo yako.

11Sitoza ulosi wako mo umoyo wanga,

vileke nisekukola masa kwako.

12Ujimbikwe weye Zumbe Chohile,

nihinya amalagizo yako.

13Kwa milomo yangu nanitamwile amalagizo yako,

zikulawa mo umlomo wako.

14Nelelwa kutimila amalagizo yako,

saviya mntu akwelelwa ugoli ulozize.

15Naniyafanyanye amalagizo yako,

na kutimila viya unihinyize.

16Nanelelwe amalagizo yako,

naho sanihufye ulosi wako.

Chinyemi mwe Malagizo ya Zumbe Chohile

17Unitendele miye mndima ywako kwa chisekwesekwe,

vileke nikale na kutoza ulosi.

18Finyula ameso yangu,

vileke nidahe kuwona,

mbuli zikwehela mwa amalagizo yako.

19Miye ni mjeni muno mwe isi,

usekunifisa amalagizo yako.

20Umoyo wangu wangadika kwa nkwina ikulise,

waunga umanye izinkanto zako chipindi chose.

21Wawakwahila wata kweduvya,

waligitwa wadya wose hewekutimila amalagizo yako.

22Nusiza ubezi na utilizi,

kwaviya natimila amalagizo yawo.

23Masekulu wekala hamwenga na kunizigiliza,

mna miye nanitimile amahinyo yako.

24Malagizo yako yanelela,

ayo yaninka ulangilizi.

Kutoza sigilizi za Chohile

25Sigonezwa hasi he malumbi,

dima ujima wangu kuligana na ulosi wako.

26Sikugambila izisila wenawe niyo wanihitula,

nihinya imiko yako.

27Nihinya nimanye imiko yako,

miye nimanye izimpituko zako.

28Untu wangu usakazwa ni chinyulu,

nitogeza kuligana no ulosi wako.

29Unegeze sila za wavu,

unihinye kwa wedi isigilizi yako.

30Sisagula sila ya chindedi,

moyo wangu utoza imiko yako.

31Sing'ang'anila imiko yako, Zumbe Chohile,

usekunileka nijelwe soni.

32Nanitimile amalagizo yako ye imiko yako,

kwaviya waninka umanyi utendese.

Lombezo dya kupata umanyi

33Zumbe Chohile, nihinya kutimila amalagizo yako,

miye naniyatoze kubula udumo.

34Ninka umanyi, miye nanitoze imiko yako,

na kuitimila kwa moyo wose.

35Nilongoza mwe sila ya malagizo yako,

kwaviya nayelelwa.

36Onyekeza umoyo wangu utimile imiko yako,

usekunionyekeza mwe mbuli zangu mwenye.

37Chinda ameso yangu nisekusinya mbuli zo uhezi,

dima uwikazi wangu kuligana ne izisila zako.

38Chintiza viya ulongile kwa mndima ywako,

ndagano ulongile mwa wadya wose wakukutimila weye.

39Nusiza soni ikunogofya,

kwaviya imiko yako ni yedi.

40Kaula ivyo hubesa nitimile amalagizo yako!

Ninka ujima mhya kwaviya mo ukanuni wako.

Kwikiya msuhi Imiko ya Zumbe Chohile

41Zumbe Chohile, nilagisa ungi wako hewine udumo,

naho unambule kuligana na ulosi wako.

42Aho, nanidahe kumhitula yoyose akunihuluta,

kwaviya nekiya msuhi wangu mwe ulosi wako.

43Nidahizo kulonga chindedi chipindi chose,

kwaviya naikiya msuhi mo ulosi wako.

44Nitimile imiko yako mazuwa yose,

kale na kale.

45Nanikale hatende silekeilwa,

kwaviya natimila amalagizo yako.

46Nanitambalise amalagizo yako kulongozi kwa maseuta,

naho saniwone soni.

47Kwaviya nelelwa mwe kutimila amalagizo yako,

kwaviya nayaunga.

48Naitunya na kuyunga imiko yako,

miye naniyafanyanye amalagizo yako.

Msuhi mwe imiko ya Chohile

49Kumbuka ulosi kwa miye mndima ywako,

kwaviya kuninka msuhi miye mndima ywako.

50Hatenda mwe masulumizo msuhi wangu nuno,

kwaviya ndagano yako yaninka ujima.

51Wata kweduvya wanisezenga hehena kusokela,

mna sanileke imiko yako.

52Zumbe Chohile, nakumbuka imiko yako ya chikale,

iyo yanisangalaza.

53Nemukwa ni maya,

umo hawona wantu wavu watula imiko yako,

nemukwa ni maya.

54Malagizo yako niyo inkongelo ye izinchemo zangu,

hohose hwikala.

55Zumbe Chohile, nechilo nakumbuka idizima dyako,

miye nanitimile imiko yako.

56Yano yatenda mazwela yangu,

natoza amalagizo yako.

Kutimila miko ya Zumbe Chohile

57Zumbe Chohile, weye wi chihendo changu,

selisa kutimila imiko yako.

58Silombeza kwa moyo wangu wose,

niwonela mbazi kuligana na viya ulongile!

59Sifanyanya izisila zangu,

elo, suya natimila amalagizo yako.

60Nanisunguze kudamanya hehena kukawa,

kutimila imiko yako.

61Wantu wavu wenika mitengo wanigwize,

mna miye sikujala imiko yako.

62Chilo cha minane nenuka na kukutogola,

kwachausa cha malagizo yako yawagile.

63Miye ni mbuya ywa wadya wose wakukuvikila,

na wadya wakutimila amalagizo yako.

64Zumbe Chohile isi imema ungi wako,

nihinya amalagizo yako.

Ujejeje we Isigilizi ya Zumbe

65Kunitendela yedi miye mndima ywako,

saviya walongaga, weye Zumbe Chohile.

66Nihinya umanyi na kulamula vyedi,

kwaviya sika msuhi mwe imiko yako.

67Umo hwinati kunisulumiza nasaga isila,

mna haluse natimila ulosi wako.

68Weye wi ywedi, icho ukutenda ni chedi,

nihinya imiko yako.

69Hata hegu wata kweduvya waniziga udanti,

mna miye natoza imiko yako kwa moyo wose.

70Myoyo yawo imema uhezi,

mna miye nabweda imiko yako.

71Nkanto itenda yedi kwangu,

kwaviya initenda nihine imiko yako.

72Miko wikiye ni yedi kwangu,

kujinka ugoli wose we mwe isi.

Uwagila we Imiko ya Chohile

73Ni weye unumbile, mikono yako inidamanya,

ninka umanyi vileke nihine imiko yako.

74Wakukuvikila nawaniwone na kwelelwa,

kwaviya msuhi wangu wi moulosi wako.

75Zumbe Chohile, sivimanya nkanto zako zichuma,

kunikantila kwa ukanuni wako.

76Ungi wako hewine udumo unitondowaze,

kuligana ne indagano kwa mndima ywako.

77Niwonela mbazi vileke nitende na ujima,

kwaviya nabweda imiko yako.

78Wata kweduvya wajelwe soni,

kwaviya waniziga mbuli zihiye,

mna miye nanifanyanye imiko yako.

79Wose wakukuvikila weze kwangu,

wose wamanyize izisigilizi zako.

80Moyo wangu usekutenda na lema mwe imiko yako,

vileke nisekujelwa soni.

Malombezo kwachausa cha kwambulwa

81Sisokela vidala kwa kugoja unambule,

msuhi wangu nawika mo ulosi wako.

82Meso yangu yafifiya hagoja ndagano yako,

miye nauza, “Nawize ini unitondowaze?”

83Sitenda mankunyankunya saviya vunje dimwe mosi,

mna vyose sijaile imiko yako.

84Miye mndima ywako nanigoje kubula ini?

Wadya wakunisulumiza nowakantile ini?

85Wata kweduvya wanisimbila mabome,

vikuhigana ne imiko yako.

86Imiko yako yose ni yo ukanuni na chindedi,

unambize kwaviya wantu wanilaha kwa udanti.

87Kenga wanikome,

mna silekile imiko yako.

88Nidamanyiza yedi kuligana no wedi wako,

miye nanitimile imiko yako ulongile.

Uzumizi mo ulosi wa Chohile

89Zumbe Chohile, ulosi wako ni wakale na kale,

wachimala utogile kwembingu.

90Ukanuni wako naujendeleze mwe ivyeleko vyose,

isi kuika hantu hakwe, nayo yakela mazuwa yose.

91Imiko yako yekala kubula dyelo,

kwaviya vintu vyose vyakuasankanila.

92Hegu nendile sikubweda imiko yako,

nasangadika mwe nkunto zangu.

93Sanijeze kujala imiko yako,

kwaviya kuninka ujima kujinkila izo.

94Nambula kwaviya miye ni ywako,

kwaviya silonda imiko yako.

95Wantu wavu wagoja wanikome,

mna miye nafanyanya imiko yako.

96Sibunkula kugamba chila chintu chabula udumo,

mna imiko yako haina mihaka.

Kuyunga imiko ya Chohile

97Nayungisa imiko yako!

Naifanyanya msi wose.

98Imiko yako ininka umanyi utendese kujinka awankondo wangu,

kwaviya naitoza mazuwa yose.

99Miye simanya kujinka wadya wose wanihinyize,

kwaviya nafanyanya imiko yako.

100Nna umanyi kujinka wadalahala,

kwaviya natimila imiko yako.

101Sechinda iviga vyangu nisekutimila sila zihiye,

vileke nidahe kutoza ulosi wako.

102Silekile imiko yako,

kwaviya kunihinya weye mwenye.

103Milosi yako ibuka mwile kwangu,

imwile kujinka uchi!

104Mwe imiko yako napata ubala,

elo nehiwe chila lujendo lwihiye.

Miko ya Zumbe yalangaza

105Ulosi wako ni ta ya kunilongoza iviga vyangu,

na ulangazi mwe isila yangu.

106Selisa na kwekamba,

kugamba nanitimile imiko yako ikuwagila.

107Zumbe Chohile, sisulumizwa vidala,

niwonela mbazi uwikazi wangu kuligana na ulongile.

108Zumbe Chohile, hokela ntogozi za kweungila zo umlomo wangu,

kwa kunihinya imiko yako.

109Hamwenga na kugamba uwikazi wangu nauwambaza mazuwa yose,

mna sanijale imiko yako.

110Wantu wavu wanitegela mtego,

mna silekile imiko yako.

111Imiko yako nulisi wangu kale na kale,

heye ni mbwedo wo umoyo wangu.

112Sekamba kwa moyo wangu,

kutimila imiko yako kubula udumo.

Kutondowala mwe Imiko ya Chohile

113Naweihiwa wata kukanganya,

mna nayunga imiko yako.

114Weye wi sumkilo dyangu na nchinga yangu,

sika msuhi wangu mo ulosi wako.

115Halaweni hangu, nyuwe mkudamanya yehiye.

Vileke nitimile imiko ya Chohile ywangu.

116Ninka udahi saviya ulongile, miye nanitende na ujima,

usekuleka msuhi wangu ubanike!

117Nidahiza miye nikale mpeho,

nanitimile imiko yako mazuwa yose.

118Wawalemela wadya wose hewekutimila imiko yako,

kwaviya udanti wawo ni wa bule.

119Wavu wose mwe isi wawadula saviya ntaka,

elo, miye nayunga imiko yako.

120Nazingiza kwa kukogoha weye,

simema nkama kwachausa che izinkanto zako.

Kutimila imiko ya Chohile

121Sidamanya mbuli zedi zichumile,

usekunileka mwemikono ya wankondo wangu!

122Nelisiza wambizi miye mndima ywako,

usekuleka wata kweduvya wanilumize.

123Meso yangu yafifiya, nagoja wambula wako,

nagoja uchintize ulosi wako we chindedi.

124Nitendela miye mndima ywako kuligana na ungi wako,

unihinye imiko yako.

125Miye ni mndima ywako, ninka umanyi,

vileke nimanye imiko yako.

126Zumbe Chohile, vino haluse ni chipindi chako cha kudamanya chintu,

kwaviya wantu hawakutimila imiko yako.

127Kwaviya nayunga imiko yako,

heye kujinka zahabu ichiligwe vyedi.

128Elo, nanitimile imiko yako yose,

nehiwa sila zose zihiye.

Kubesa kutimila imiko ya Chohile

129Imiko yako yehela,

elo, naniitoze.

130Malangilizo ya amahinyo yako yaleta ulangazi,

yawenka ubala wantu hewemanyize chintu.

131Sigubula umlomo wangu na kutweta,

nabesa vitendese nitimile imiko yako.

132Nihitukila naho niwona mbazi,

saviya ukuwadamanyiza wadya wakukunga.

133Longoza izinkacho zangu kuligana na ulosi wako,

usekuleka masa yoyose yanilongoze.

134Nambula mwe wihi wa wantu,

vileke nidahe kutimila imiko yako.

135Nilangaza kwa ulangazi wako,

naho nihinya imiko yako.

136Meso yangu yetika mesozi saviya mto,

kwaviya wantu hawakutimila imiko yako.

Ujejeje we imiko ya Chohile

137Zumbe Chohile, weye wimta uwagila,

nkanto zako zawagila.

138Imiko yako uchinkile yawagila,

ichinta kikanuni.

139Sihiwa vitendese,

kwaviya wankondo wangu wabela imilosi yako.

140Ndagano zako zichinta,

miye mndima ywako nazunga.

141Miye ni mdodo naho nabelwa,

mna sikujala imiko yako.

142Uwagila wako ni wakale na kale,

ne imiko yako ni chindedi.

143Nkunto na chinyulu vinipata,

mna imiko yako yanelela.

144Imiko yako yawagila mazuwa yose,

yaninka umanyi vileke nidahe kuta mjima.

Lombezo dya kukombolwa

145Nakwitanga kwa moyo wangu wose,

nihitula weye Zumbe Chohile, miye nanitimile imiko yako yose!

146Nakwitanga unambule,

miye nanitoze imiko yako.

147Zuwa hedinati kutontomoka, nakulombeza wambizi,

sika msuhi wangu mo ulosi wako.

148Chilo chose sifinya ngohe,

vileke nidahe kufanyanya amalagizo yako.

149Kwa mbazi zako weye Zumbe Chohile,

nifila mbazi uhonye uwikazi wangu kuligana ne imiko yako.

150Wadya wakwika mizungu ihiye wehajihi na miye,

mna wehale ne imiko yako.

151Mna weye Zumbe Chohile wihajihi,

imiko yako yose ni yachindedi.

152Kukongela chikale sihina amalagizo yako,

kuyaika vileke yekale kale na kale.

Kulombeza wambizi

153Kaula sulumizo dyangu unambule,

kwaviya sijaile imiko yako.

154Nigombela na kunambula,

uninke ujima kuligana na ulosi wako.

155Wambula wako wihale na wantu wavu,

kwaviya hawakulonda amalagizo yako.

156Zumbe Chohile, mbazi zako ziloza,

nilagisa mbazi zako na kunambula kuligana na viya ulongile.

157Wankondo wakunisulumiza waloza,

mna miye saniileke imiko yako.

158Umo hawasinya hewekuzumila, nehiwa vitendese,

kwaviya hawakutimila imiko yako.

159Kaula ivyo hunga amalagizo yako,

Zumbe Chohile, ninka ujima,

kuligana no ungi wako!

160Milosi yako yose ulongile ni chindedi,

malagizo yako yose yachuma, yekala kale na kale.

Kutimila imiko ya Chohile

161Masekulu wanebunga hehena luhosa,

mna miye natunya imilosi yako kwa moyo wangu wose.

162Nelelwa ulosi wako,

saviya mntu atahile vintu vya yombe kulu kwe nkondo.

163Nemukwa ni maya na kwihiwa udanti vitendese,

mna naunga imiko yako.

164Chila zuwa nakutogola nkanana mfungate,

kwachausa che imiko yako iwagile.

165Wakunga imiko yako wana utondowazi mkulu,

hahana chintu chikudaha kuwagwisa.

166Zumbe Chohile, nakugoja unambule,

miye nanitimile imiko yako.

167Natimila imiko yako,

kwaviya yaniwagila vitendese.

168Natimila imiko yako,

kwaviya sila zangu zose zimanyika kwako.

Kulombeza wambizi

169Ndilo yangu ya wambizi ikubwile, weye Zumbe Chohile,

ninka umanyi kuligana na ulosi wako.

170Malombezo yangu yabule kulongozi kwako,

nambula kuligana na ulosi wako.

171Nanilonge ntogozi zako ulo na ulo,

kwaviya wanihinya imiko yako.

172Nanicheme ulosi wako,

kwaviya imiko yako yose yawagila.

173Mazuwa yose wemalanye kunambiza,

kwaviya natimila imiko yako.

174Zumbe nabesa unambule,

imiko yako niyo hubweda.

175Ninka ujima vileke nidahe kukutogola,

ne imiko yako inambize.

176Sangadika saviya ngoto yagile,

nilonda miye mndima ywako,

kwaviya sijaile imiko yako.