Ntogozi 118

Kuhongeza kwa Uhuda

1Mhongezeni Zumbe Chohile,

kwaviya ni ywedi,

ungi wakwe ni wa kale na kale.

2Wantu wa Izulaeli wagambe,

“Ungi wakwe ni wa Kale na kale.”

3Welekwa wa Haluni wagambe,

“Ungi wakwe ni za kale na kale”

4Wantu wose wakumvikila Zumbe Chohile wagambe,

“Ungi wakwe ni wa kale na kale.”

5Mwa amasulumizo yangu simwitanaga Zumbe Chohile,

uyo niyo anihitula kwa kunilekeila.

6Zumbe Chohile ehamwenga na miye sanogohe,

mntu naanitende mbwani?

7Zumbe Chohile ehamwenga na miye, nuyo akunambiza,

wankondo wangu naniwawone wakahundwa.

8Nivyedi ukamgulukila Zumbe Chohile,

ukaleka kwika msuhi kwa mntu.

9Nivyedi ukamgulukila Zumbe Chohile,

ukaleka kwikiya msuhi masekulu wa wantu.

10Wantu we izisi zose nendile wanizunguluka,

mna nawabalangaga kwa nguvu ya Zumbe Chohile!

11Nawanizunguluka ntendele zose,

mna nawabalangaga kwa zina dya Zumbe Chohile!

12Nawanizunguluka saviya tuluma dya nyuchi,

mna niyo wasunguza kubanika saviya miwa ikuhya,

nawabalangaga kwa zina dya Zumbe Chohile.

13Nasebungiswe hadodo nihudwe,

mna Zumbe Chohile kanambiza.

14Zumbe Chohile ni nguvu yangu nkulu,

uyo mwenye nuwo uwambula wangu.

15Maizwi ya chinyemi na uhuda zavumila mlanga mwa wantu wata uwagila,

“Umkono wa kulume wa Zumbe Chohile utenda ntendwa nkulu!

16Nguvu zakwe zichigaila uhuda,

udahi wakwe utenda mbuli nkulu!”

17Sanibanike mna nanitende mjima,

miye nanitambalise ntendwa adamanye Zumbe Chohile.

18Zumbe Chohile, kanisulumizisa,

mna hanilekile nibanike.

19Nivuguila izinchili zo uwagila,

miye naningile na kumhongeza Zumbe Chohile.

20Ino ni nchili ya Zumbe Chohile,

wata uwagila awodu wadaha kwingila.

21Nahuhongeza, kwaviya kunihitula,

kutenda wambula wangu.

22Yuwe dilemelwe ni wazesi,

ditenda yuwe kulu dya chegamilo.

23Zumbe Chohile kadamanya vino,

vino vyehela mwa ameso yetu.

24Dino ni zuwa dyo uhuda wa Zumbe Chohile,

chitowe nchelejele na kwelelwa!

25Zumbe Chohile chambule,

Zumbe Chohile, chinke kuchumilwa!

26Ujimbiko ni wa yudya akwiza kwa zina dya Zumbe Chohile!

Kulawa mwe Inyumba ya Zumbe Chohile chakujimbika.

27Zumbe nuyo Chohile, uyo nachilangazize ulangazi wakwe.

Mkatenda na mahuto mwe imikono yenyu, damanyani ngasu,

kubula kwe impembe ya amazabahu.

28Weye wi Chohile ywangu, nahutogole,

weye wi Chohile ywangu nahuhongeze.

29Mhongezeni Zumbe Chohile,

kwaviya ni ywedi,

ungi wakwe ni wa kale na kale.