Ntogozi 115

Chohile Yumwenga Ywa Chindedi

1Zumbe Chohile,

wakutogolwa sawo suwe, mna utogolwe weye ichedu,

kwachausa cha ungi na ukanuni wako.

2Kwambwani wantu hewekumanyize wauze,

“Chohile ywenyu ekuhi?”

3Chohile ywetu ekwembingu,

uyo adamanya chochose chikumwelela.

4Mna imilungu yawo idamanywa kwa chumbu na zahabu,

isanwa kwa mikono ya wantu.

5Yana milomo mna hayakudaha kulonga,

yana meso mna hayakudaha kuwona.

6Yana magutwi mna hayakudaha kwiva,

yana mpula mna hayakudaha kuhefya.

7Yana mikono mna hayakudaha kuhahasa,

yana viga mna hayakudaha kujenda,

naho amakongomelo yawo hayakudaha kulavya izwi.

8Wadya wakuyadamanya nawatenda sa ayo,

wadya wakuzikiya msuhi iviya wenga seizo.

9Nyuwe wantu wa Izulaeli,

ikani msuhi wenyu kwa Zumbe Chohile.

Uyo nuyo nawambizeni na nchinga yenyu.

10Nyuwe welekwa wa Haluni, mwikiyeni msuhi Zumbe Chohile,

uyo nuyo nawambizeni na nchinga yenyu.

11Nyuwe mkumvikila, ikani msuhi wenyu kwa Zumbe Chohile,

uyo nuyo nawambizeni na nchinga yenyu.

12Zumbe Chohile achikumbuke na kuchijimbika,

nawajimbike awetu wa Izulaeli,

nawajimbike awalekwa wa Haluni.

13Uyo namjimbike chila mntu akumvikila,

mkulu na mdodo.

14Zumbe Chohile awajenyezeni,

nyuwe na awana wenyu.

15Mjimbikwe ni Zumbe Chohile,

Mumbi ywe imbingu ne isi!

16Mbingu zikulanga vitendese niza Zumbe Chohile,

mna isi kawenka wantu.

17Wabanike hawakumtogola Zumbe Chohile,

hegu wadya wakusela hantu hanyamale.

18Mna suwe nachimjimbike Zumbe Chohile,

vino haluse na kale na kale.

Mtogoleni Zumbe Chohile!