Ntogozi 116

Ntogozi ya mntu Ahonyigwe mwe unyonje

1Namunga Zumbe Chohile kwaviya kaniva idizwi dyangu,

kaniva amalombezo yangu.

2Kwaviya kanitegeleza gutwi dyakwe,

nanimwitange mazuwa yose yo ujima wangu.

3Hatali za file nazinizunguluka,

vya mbila vinebunga,

nasimemwa ni nkunto na chiholozi.

4Vikaheza niyo namwilila Zumbe Chohile,

“Weye Zumbe Chohile nakweila unambule!”

5Zumbe Chohile kamema wedi na ukanuni,

Chohile ywetu ni mta mbazi.

6Zumbe Chohile awadima wakunyanyahala,

umo nendile mwe nkunto zitendese anambulaga.

7Miye sitondowala,

kwaviya Zumbe Chohile kanidamanyiza yedi.

8Zumbe Chohile kunambula mwe file,

kunihangusa amesozi yangu,

kuhonya iviga vyangu nisekwekobadika.

9Elo, nadaha kujenda kulongozi kwa Zumbe Chohile,

mwe isi ya wata ujima.

10Nasizumila, elo niyo nagamba,

“Miye sisulumizwa vitendese.”

11Mwe izinkunto zanga nagambaga,

“Wantu wose ni wadanti.”

12Nanimvuzize mbwani Zumbe Chohile,

kwa wedi wakwe wose anitendele?

13Nanimlavize ntambiko ya divai kwa kunikombola,

nanilombeze kwa zina dyakwe Zumbe Chohile.

14Nanizichintize izindagano zangu kwa Zumbe Chohile,

kulongozi kwa wantu wose.

15File ya wantu wakukile inayombe kulu,

kulongozi kwa Zumbe Chohile.

16Weye Zumbe Chohile,

chindedi miye ni mndima ywako,

miye ni mndima ywako,

mwana ywa msuntaviya, ywako

kunambula mwe file.

17Nahulavize ntambiko ya kuhongeza,

na kuditanga idizina dya Zumbe Chohile.

18Nanichintize amalagane yangu kwako Zumbe Chohile,

kulongozi kwa wantu wose,

19mwe izinyuwa ze Inyumba ya Zumbe Chohile hagati ha Yelusalemu.

Mtogoleni Zumbe Chohile.