Ntogozi 111

Ntogozi kwa Chohile kwa ntendwa zakwe

1Mtogoleni Zumbe Chohile!

Kwa moyo wangu wose nanimhongeze Zumbe Chohile,

mwe balaza ya wakanuni na mwe mdugano wa wantu wakumvikila Zumbe.

2Ntendwa za Zumbe Chohile zikulisa!

Wose wakuwagizwa nizo wazifanyanyisa.

3Ndima zakwe zimema ukulu na ukuka,

ndima zakwe zekala kale na kale.

4Katende mpituko zakwe zisekujalwa,

Zumbe Chohile ni ywedi na mta mbazi.

5Awenka nkande wadya wakumvikila,

mazuwa yose hakujala lagano dyakwe.

6Kawalagisa awantu wakwe udahi we izindima zakwe,

kawenka izisi za wantu watuhu.

7Ndima zose adamanye ni zo ukanuni na uwagilwa,

ulangilizi wakwe wose ni chindedi.

8Malagizo yakwe yekala kale na kale,

yadamanywa kwa ukanuni na uchumi.

9Kawakombola awantu wakwe,

kalagiza lagono dyakwe dya kale na kale,

zina dyakwe dikuka naho ni dyakogofya.

10Kumvikila Zumbe Chohile ni nkongelo yo ubala,

wose wakutimila imiko yakwe akili zawo ni zedi.

Ntogozi zakwe zekala kale na kale.