Njelo 9

Ubala na Uhezi

1Ubala kazenga nyumba yakwe

na kudamanya nguzo zakwe mfungate.

2Kamalanya ngasu, kachinja wanyama,

kamalanya divai,

na kumalanya meza yakwe.

3Katuma wandima wakwe wa chiche komzi,

wetange wantu kulawa ko lunenengwe lwa awagulu, 4wakagamba, “Soni, nyuwe wantu hemmanyize dyodyose!”

Na kwa wadya amahezi akagamba, 5“Soni mdye inkande yangu

na kunywa idivai idya nidamanye.

6Lekana na sila zo uhezi chani wikale,

na utimilani sila ya umanyi.”

7Mntu yoyose akumlangiliza mntu mta ubezi alonda kuhulutwa,

Mntu yoyose akumkwahila mntu mwihi alonda kulumizwa.

8Use kujeza kumlangiliza mntu mta ubezi, nakwihiwe. Mna una mlangiliza mntu mta ubala nakunge.

9Chochose nomgambile mntu mta ubala nachimtende atendese na ubala,

mhinye mkanuni uyo nahikilize kuhina.

10Kumvikila Zumbe Chohile ni nkongelo ya umanyi,

uneva unammanya Mkuka,

una umanyi.

11Kwachausa changu miye Ubala nahongezeze mazuwa,

nahongeze mihilimo ilozize mo wikazi wako.

12Uneva una ubala wachumilwa weye mwenye,

mna uneva una ubezi wabanikilwa weye mwenye.

13Mvyele mhezi ana lwasu,

hamanyize chintu naho hana soni.

14Ekala ho lwivi lwe inyumbakwe,

hegu kwika fumbi hantu henukile ho umzi, 15na kuwetanga wantu wakujinka mwe isila,

wantu wakwita kwe izindima zawo, 16akawagamba, “Soni kuno,

nyuwe wantu hemwimanyize dyodyose!”

Kwa wadya amahezi agamba, 17“Mazi yo ubavi yemwile vitendese,

mkate ukudigwa chinyele wimwile vitendese.”

18Mna wadya akugwiza hamanyize kugamba watu wakwita kwe inyumba yakwe wabanika,

hawamanyize kugamba wajeni wengilaga mwe inyumba yakwe wengila mwe lwina lwa mbila.