Njelo 8

Kutogola Ubala

1Tegeleza! Ubala wetanga.

Umanyi walavya izwi dyakwe.

2Mlanga mwa magulu haguhi he isila

na mwe silampanda numo akuchimala.

3Mwe inchili yo umzi,

hantu wakwingila wantu, etanga kwa izwi akagamba,

4“Nyuwe wantu wose

nawagonekeni nyuwe,

mwitango wangu nawetengani chila yumwenga mwe isi.

5Nyuwe hemkukombaganya hinani kutenda na akili.

Nyuwe mwi mabwambwaza tendani na umanyi. 6Tegelezani mbuli zangu zedi,

yoseni huwagambilani yachuma.

7Mlomo wangu walonga chindedi ichodu,

udanti kwangu wanihiza.

8Chila chintu hulonga ni chindedi,

hahana udanti hegu ikwazaganya.

9Kwa mntu mta kukombaganya chila chintu ni pwilili,

kwa wata umanyi yose yaligana.

10Sagula amahinyo yangu ukaleka mayuwe ya chumbu,

sagula ubala ukaleka zahabu ntana.”

11“Miye ubala ni ywedi kujinka yuwe dya yombe kulu,

hahana chintu ukudaha kuliganya na miye.”

12Miye ubala, nna umanyi.

Nadaha kubunkula na kumanya.

13Kumvikila Zumbe Chohile ni kwihiwa wavu.

Na kwihiwa wefenyi na kweduvya,

mazwela yehiye na kwihiwa milongi ihiye.

14Miye nna udahi wa kulangiliza naho nna ubala.

Nna umanyi naho nna udahi.

15Nambiza maseuta wadahe kulongoza,

na vilongozi kutunga sigilizi zedi.

16Nawambiza vilongozi kulongoza,

iviya masekulu na walamuzi wakulongoza mwe isi.

17Nawaunga wadya wakununga,

akunilonda kwa moyo nawanipate.

18Nna ugoli na ntunyo,

kwenenwa na kuchumilwa.

19Ntunda zangu ni zedi kujinka zahabu ntana,

icho hulavya china yombe kujinka mayuwe ya chumbu. 20Najenda mwe sila ichumile,

natimila sila za uwagila,

21nawenka ugoli wadya wakununga,

na kumemeza izihazina mwe izinyumba zawo.

22“Zumbe Chohile anumbaga mwe nkongo,

nkongelo ye indima yakwe, chikale chijinkile.

23Sisagulagwa mwe nkongo ya chila chintu,

umo isi heinati kumbwa.

24Nelekagwa umo imizumilizo ye bahali hainati,

hadya hakwendaga na soko za mazi.

25Naumbagwa umo hakwendaga na magulu,

hata wagulu wendaga hawanati kwikwa hadya weli,

nendile selekwa kale.

26Zumbe Chohile henati kumba isi ne izinkonde zakwe,

hegu fumba dya sanga dyodyose mwe isi.

27Nendaga aho umo ulanga ukaikwa ahantu hakwe,

umo aikaga imihaka mlanga mwe ibahali,

28umo aikaga amaingu mo ulanga,

umo avugula izisoko ze ibahali,

29umo akaikiya ibahali imihaka yakwe,

chani amazi yasekujinka imihaka yakwe,

yasekujinka hadya alongile,

nendaga aho umo aikaga imisingi ye isi.

30Nendaga hankanda hakwe saviya mzesi mkulu,

nendaga mbwedo wakwe chila zuwa,

nendile havina kulongozi kwakwe mazuwa yose,

31helelwa mwe isi yakwe aumbile,

na kuwabweda awantu wakwe.”

32“Haluse, wanangu, nitegelezani.

Damanyani saviya hulonga,

namjimbikwe mazuwa yose.

33Tegelezani amahinyo yangu, mtende wabala,

msekuyabela.

34Wadya wakuniva nawatende na chinyemi,

wadya wakwikala ho lwivi lwangu chila zuwa,

wakugoja he inchili ye nyumba yangu.

35Kwaviya wakunilonda wapata ujima,

Zumbe Chohile nawahingize, napate luhenyo kulawa kwa Zumbe Chohile.

36Mna yoyose akudunduga kunipata elumiza mwenye,

yoyose akunihiwa aunga file.”