Njelo 7

1Mwanangu, kumbuka vino hulonga,

naho use kujala vino hukugambila udamanye.

2Toza amalagizo yangu vileke wikale,

ukaulise na kutimila amahinyo yangu saviya ukudima ameso yako.

3Wikale na mahinyo yangu,

chila nkanana yakumbuke.

4Utundulie ubala saviya lumbudyo

na umanyi saviya mlukolo ywako.

5Nawakwenegeze na mvyele mchilanga,

navikutende wenege milosi ikuluvya ya mvyele suyo mkanuni.

Mvyele mchilanga

6Zuwa dimwenga nasungilaga kuse kujinkila mwe ididilisha dye inyumba yangu,

7niyo nawona wabwanga walozize wahezi,

vitendese yumwenga endaga bwambwaza.

8Uyo nendile akajenda mwe isila idya,

haguhi ne impembe nakekala mvyele msiku.

Elo niyo atoza isila ikwita kwe iyumba ya uyo mvyele, 9Nechisingi chiza hechinati kwingila.

10Mvyele uyo niyo adugana na yudya mbwanga,

mvyele nendile kavala saviya mchilanga akudamanya upapala wakwe.

11Ni mvyele mta milosi ilozize,

naho hana soni akungisa kudyangaya mwe izisila,

12ahamwenga achimala mwe chila mpembe,

hamwenga mwe izisila mpanda,

hamwenga mwa amagwilo.

13Kamkumbatila uyo mbwanga,

na kumbusu kamkaula mo uso na kumgamba,

14“Dyelo silavya ntambiko yangu ya wivano,

naho dyelo sichintiza inazili yangu.

15Nivyo vilekile sifosa husingile,

sikulonda kwa nkwina haluse sikupata!

16Sitandika ulusazi lwangu kwa shuka za langi ing'aile,

zilaile Misili.

17Silujela mavuta ya kupwepweleka,

na udi na mdalasini.

18So chigone hamwenga kubula mtondo!

So chibwede kudegesana.

19Mgosi wangu hahali hanyumba,

kaita utafi wa hale.

20Kaguha hela zilozize,

naho hauye hakaya kbla udumo wo mwezi.”

21Ivyo kamluvya kwa milosi imwile,

na kumwinka milosi ilozize ya kumhembeleza.

22Aho yudya mbwanga niyo amtimila yudya mvyele saviya njeku ikwita kuchinjwa,

saviya kapala kakuhinga kwe lufyusa,

23habunkule kugamba wikazi wakwe wimwe nkondo,

kubula eze ebwile katungwa mfulo mo umoyo wakwe.

Kekala saviya kadege kagwiligwe mwe lwavu.

24Haluse, wanangu,

nitegelezani. Mwivise vino hulonga.

25Use kuzumila mo moyo wako umtimile uvyele uyo,

naho use kujinka mwe isila yakwe.

26Kwaviya kagwisa wagosi walozize,

na kuhosa file za wagosi walozize hewe kuwazika.

27Nyumba yakwe ni sila ya kwita kwedibome hedina uhelo,

ni sila njihi ikuonyekeza kwe file.