Njelo 6

Makanyo matuhu

1Mwanangu uneva kumwikiya zamana mbuyayo,

hegu kwika cheliso chako kwachausa cha mnyao,

2hegu kwegwiza mwe milosi yako mwenye,

kwegwiza mwe yadya wikiye ndagano.

3Umanye kugamba kwingila mwe lwavala mwa uyo mnyawo,

mna mwanangu uneva waunga wehambule damanya vino,

sunguza mbase umntu uyo mweile akulekele.

4Use kujeza kugona hegu kuhumula,

usekuleka ngohe zako zisinke.

5Kwelavye mo ulufyusa ulo saviya kapala,

hegu kadege kakwenega lufyusa.

6Weye mntu mbwa hina kulawa mwe sila za mswa ivyo ukwikala.

7Hawana chilongozi,

hegu sekulu hegu mchimaila, 8mna weikiya mpamba mwe chipindi cho ulozo,

wachisanya chipindi nkande mo uvuni.

9Weye mbwa nogone kubula ini?

Nawinuke umo ini?

10Wagamba, “Goja nigone hadodo,

nisinke hadodo.

Nileka imikono yangu itwete.”

11Mna hadya akugonela,

uchiwa nawimwebunge saviya mpolaganyi,

uswesi naukutimile saviya nyakwili mta chiziha.

12Mntu mdanti, mntu mwavu,

adwangaya akalonga milosi yo udanti.

13Wantu wavu wakonyeza wantu kwa meso chani wahose watuhu waswese,

wasila iviga na kulagisa wantu kwa wadole,

14akatenda kamema udanti mo umoyo alonga wavu,

ahosa nkumbizi chila hantu.

15Kwachausa che izimbuli izo nawebungwe ni file,

chipumpa nalumile vihiye asekudaha kuhona.

16Kuna mbuli mfungate Zumbe Chohile akuzihiwa,

heye vintu mfungate vikumsibila,

17izo ni meso ya kweduvya,

na lulimi lukudanta na mikono ikukoma wantu hewena lema,

18fanyanyi zikuwazagula ubanasi,

na viga vikugulukila ubanasi,

19mlavyanya ywa udanti,

na mntu akuhosa walukolo walemane.

Kanyo mwa wachilanga

20Mwanangu, damanya yadya iso akugamba udamanye,

naho use kujala viya nyokwe akuhinyize.

21Ika imilosi yawo mazuwa yose,

italize mwe isingo yako saviya mkufu.

22Umo ukatamba,

nayakudime nechilo,

na kukulangiliza nomsi.

23Kwaviya miko yawo ni ta,

malangilizo yawo yadaha kukuhinya ivyo vyo kwikala.

24Nayakutende wenegeze na mvyele ehiye,

nayakse kulawa mwe milosi yedi ya mvyele mchilanga.

25Use kuluvywa nu utana wakwe,

naho use kugwizwa na ameso yakwe yalegele.

26Kwachausa cha mvyele mchilanga mtu adaha kutenda mchiwa na kulombeza mkate,

mna mkaza mwenye ahosa mntu aze chila chintu.

27Togola mntu adaha kwika moto mwe ichifuwa chakwe,

ne izisuche zakwe zise kuhya?

28Togola mntu adaha ajate makala ya moto,

ne izinyayo zakwe zisekuhya?

29Ivyo nivyo vikale kwe mntu akugona na mkaza mntu,

yoyose nadamanye ivyo hadahe kwenega nkanto.

30Wantu hawakumbela mntu akubawa uneva ana sala, 31hata ivyo anagwilwa nalihizwe nkanana mfungate,

naho nalavye chila chintu ananacho.

32Mgosi akudamanya uchilanga hana akili,

naho ebalanga mwenye.

33Natoigwe na kulumizwa,

naho soni hazimlawe mazuwa yose.

34Kwaviya wivu wenula maya kwa mgosi wa mwenye vitendese,

naho nalihize chikoda hena mbazi.

35Hazumile maliho yoyose,

hata yakatenda ni makulu vitendese.