Njelo 5

Kanyo mwe uchilanga

1Mwanagu tegeleza ubala wangu,

tegeleza vyedi milosi yangu yo ubala,

2chani udahe kwika ubala kwedime vyedi,

na milosi yako na ilagise kugamba wi mmanyi.

3Milomo ya mvyele mchilanga yalonga milosi imwile saviya uchi,

milosi yakwe yaluvya ujika mavuta ya mizaituni,

4mna mbuli zinaheza akwasiza usungu saviya sungwi,

ni saviya sime ikukanta kwidi.

5Unamtimila nakwigale kwe idibome hedina uhelo,

sila akujinkila ni sila ya file.

6Hekale mwe sila ya ujima,

sila zakwe zigonja, mna mwenye hamanyize icho chikulaila.

7Haluse wanangu nitegelezani,

naho mnase kujeza kujala vino huwagambilani.

8Mwenege uyo mvyele!

Naho use kusogela haguhi no ulwivi lwakwe!

9Unase kulavya nguvu zako kwa watuhu,

naho use kulavya ujima wako kwa wantu manyakwili.

10Usekuleka wajeni waguhe ugoli wako wose,

na viya utumbwazikile niyo vyatenda vya mntu mtuhu.

11Mo udumo wo ujima wako nogone mo ulusazi na kuugula,

umo izinyama zo umwili wako zikatenda zisokela,

12naho nogambe,

“Ni mbwani hasa kuhina?

Ni mbwani haleka kuwetegeleza wadya wendile wakanilangiliza?

13Siwetegeleze awahinya wangu.

Naho siwatunyize yadya wanigambile.

14Haluse nihaguhi na kubanikilwa

mwe mdugano wa wantu singila soni.”

15Nywa mazi kulawa mwe sima dyako mwenye,

yakujuluzika kulawa mwe sima dyako mwenye.

16Kwambwani mazi ye izisoko zako zimwaganike hale,

ne ivimto vya amazi vizagale mwe isila.

17Leka vitende vyako du,

visekutenda vya wajeni.

18Soko zako zijimbikwe,

mwelelwa mkaziwo usoile mo ubwanga wako,

19uyo ni mtana saviya dondolo, awagiza saviya kapala.

Matombo yakwe yakwelele chila nkanana,

leka ungi wakwe ukuzunguluke.

20Mwanangu ni mbwani winkize ungi wako kwa mvyele mchilanga?

Ni mbwani ukubatile chifuwa cha mvyele mtuhu?

21Zumbe Chohile awona chila chintu ukudamanya,

uko nawite akuwona.

22Ntendwa zihiye za mntu mwavu zamgwiza mwnye,

sigi za amasa yakwe zamgwiza chinguvu.

23Wabanika kwaviya hawa kwedima. Uhezi wawo wawegala kwe izimbila zawo.