Njelo 4

Loso lwa Ubala.

1Mwanangu tegeleza ivyo tati yako akukuhinya,

tegelezesa umpate kukombaganya.

2Yano hukuhinya ni yedi,

ivyo yakumbuke yose.

3Umo nendaga mbwanga mdodo mwe ikaya ya tate,

nendaga mwana chilume ichedu kwa welesi wangu, 4tate anihinyaga; akagamba,

“Ukumbuke yano hukuhinya

damanya vino hukuhinya vileke wikale.

5Utende na ubala naho utende na umanyi!

Unase kujala hegu kubela ino imilosi yangu.

6Usekumleka ubala,

uwo naukudime,

umunge naye nakudime.

7Kutenda no ubala ni chintu chedi ukaleka vintu vyose.

Hata hegu navyunge viya vyose unanavyo.

8Umunge ubala,

nakutende mntu mkulu.

Mkumbatile naye nakutende utunywe.

9Uyo natende chilemba chako cho ukuka,

na kukwinka chilemba cho uhuda.”

10Mwanagu tegeleza,

yatozese yano hukugambila,

nawikalise wikazi mtali.

11Sikulagisa sila yo ubala,

sikulongoza mwe sila ichumile.

12Ukajenda nkacho zako hazichindwe,

uneva ukaguluka howebaje.

13Nkanana zose kumbuka yadya uhinyigwe,

yadime yasekuchulupuka,

kwaviya ayo nayakulongoze mo uwikazi wako.

14Use kutimila sila za wabanasi,

use kutimila lujendo lwa wantu wehiye.

15Use kudamanya ivyo!

Kwenege na wantu wavu!

Waleke timila sila yako.

16Wantu wavu hawakudaha kugona hewedamanye wavu.

Wadunduga kugona kubula wamwazaganye mntu.

17Kwaviya wadya nkande kulawana na ntendwa zawo zo wavu,

waywa divai kulawana ne izintenwa zo uwavu wawo.

18Mna sila ya wantu wachumile ni saviya ulangazi ukulangaza mtondotondo,

walangazisa hata kubula nomsi.

19Mna sila ya wantu wavu, ni saviya ziza.

Webaja, mna hawakumanya icho chikuwabaja.

20Mwanangu tegelezesa yano hukugambila,

Tegelezesa imilosi yangu.

21Use kuleka yamlawe mwako,

yakumbuke na kuyaika mo umoyo wako.

22Kwaviya yenkiza ujima kwa wadya wakuipata,

na kuhonya imili yawo.

23Dimisa umoyo wako kujinka vintu vyose,

kwaviya uko nuko kukulawa izisoko zo ujima wako.

24Kwenege na mbuli zikwazaganya,

use kulonga milosi yo udanti.

25Ameso yako yaonyekeze kulongozi,

meso yako yakombatize kulongozi kwako.

26Malanya izisila zako ukujinka,

mikumbi yako yose naitoge.

27Elo usekuhituka kulume hegu kumoso,

chani wenege mbuli za wavu.