Njelo 3

Malangilizo matuhu kwa wabwanga

1Mwanangu, unasekujala amahinyo yangu,

chila nkanana yakumbuke na kuyaika amalagizo yangu mo umoyo wako.

2Kwaviya mahinyo yangu nayakwinke wikazi mtali,

na kukwinka kuchumilwa mo wikazi wako.

3Kunyanyahala na ukanuni visekwenegana na weye.

Vitalize mwe isingo yako,

na kuviwandika mo moyo wako.

4Ivyo unadamanya vino,

nozumilwe kulongozi kwa Zumbe Chohile na awantu.

5Mwikiye msuhi Zumbe Chohile kwa moyo wako wose.

Usekujeza kwegamila fanyanyi zako mwenye.

6Mkumbuke Zumbe Chohile mwe chila mbuli ukudamanya,

uyo nakulagise sila yedi.

7Usekwetenda kugamba wi mbala vitendese,

mvikile Zumbe Chohile na wenege na wavu.

8Uneva unadamanya seivyo,

notende mjima mo umwili wako,

na amavuha yako nayatende na nguvu.

9Mtunye Zumbe Chohile kwa ugoli wako,

na kwa malimbulo yo ulozo wako wose.

10Unadamanya ivyo,

amagulu yako nayameme ulozo vitendese,

na mapipa yako nayamemese divai mpya.

11Mwanangu, Zumbe Chohile akakulangiliza mwetegeleze,

naho usekuyeihiwa amafundo yakwe.

12Kwaviya Zumbe Chohile awenka makanyo wadya akunga,

saviya welesi wakuwenka makanyo wana wawo wakwefenyeza.

13Kajimbikwa yudya mntu akubunkula ubala,

yudya akupata umanyi.

14Ubala ni wedi kujinka mayuwe ya chumbu,

naho una chongezeko kujinka zahabu.

15Ubala una yombe kujinka yuwe dya yombe kulu,

hahana chintu ukudaha kuliganya naicho.

16Kwa mkono wakwe wa kulume ubala nakwinke wikazi mtali,

na kwa mkono wakwe wa kumoso nakwinke ugoli na ntunyo.

17Sila zakwe ubala zawagila,

zose zaonyekeza kwe utondowazi.

18Ubala ni saviya mti wa ujima,

wadya nawampate nawajimbikwe.

19Zumbe Chohile kaumba isi kwa ubala wakwe,

kwa fanyanyi zakwe kaika ulanga hantu hakwe.

20Kujinkila ubala wakwe katenda imito ijuluzike mazi,

na maingu yalagaze mnyuzu mwe isi.

21Mwanangu, usekuleka ulamuzi wedi na kuhola,

usekuzumila vimlawe mwako, 22Ivintu ivyo,

navikwinke ujima mwako,

na mahambo matana mwe isingo yako.

23Nojende mpeho mwe isila yako,

naho hawekobadike mpwii.

24Ukagona hotende na nkama,

nechilo nogone ntongo fofofo.

25Usekogoha mwe mbuli zikutisa chipumpa,

hegu ukebungwa ni wantu wavu.

26Kwaviya Zumbe Chohile nuyo akukudahiza,

nakwenegeze chani usekgwizwa ni lufyusa.

27Usekumnyima chintu mntu akukulombeza wambizi,

uneva ukadaha kudamanya ivyo.

28Usekumgamba mbuyayo agoje kubula luvi,

kuno weye wadaha kumwinka dyelo chiya akunga. 29Usekwekamba yehiye mwa mbuyayo,

akwikala hajihi na weye hehene nkama.

30Usekulemana na mntu yoyose hehene luhosa,

hegu hakudamanyize mbuli yoyose.

31Usekumtogola mntu akweduvya,

hegu kwigiliza viya akudamanya.

32Kwaviya Zumbe Chohile aweihiwa wakudamanya wihi,

mna uyo awatenda wambuyaze wantu wakanuni.

33Zumbe Chohile awatila wantu wabezi,

mna ajimbika wikazi wa wakanuni.

34Awabela wantu wabezi,

mna awahingiza wadya wakunyanyahala.

35Wata ubala nawalisi ntunyo,

mna wahezi nawalisi soni.