Njelo 2

Loso lwa Ubala

1Mwanangu hina chiya huhinyize,

usekujala chiya hugambile udamanye.

2Tega gutwi utegeleze cho ubala,

onyekeza umoyo wako upate umanyi.

3Chindedi lombeza winkigwe ubala,

lomboleza winkigwe umanyi.

4Londa kwa nguvu saviya akulonda mayuwe ya chumbu,

hegu saviya akulonda ugoli ufisigwe.

5Uneva unatenda saivyo,

nomanye mana ya kumvikila Zumbe Chohile,

naho nochumilwe mo kuhina kumlanga Chohile.

6Kwaviya Zumbe Chohile awenka wantu umanyi,

momlomo wakwe mwalawa ubala na umanyi.

7Awaikiya uhuda wedi wakanuni,

uyo ni nchinga kwa wantu wakwikala kwa ukanuni.

8Adima wantu wakudamanya yakwagila,

na kulogoza sila za wantu wakumsankanila.

9Unanitegeleza nomanye mbuli zikungwa na ukanuni na mbuli iligane,

nomanye chiya ukungwa udamanye.

10Kwaviya umanyi nawingile mo umoyo wako

na ubala nauwinke mbwedo untu wako.

11Kuhola nakukudime,

na umanyi naukwike, 12navikutende wenege sila za wavu,

na wantu wakulonga milosi ya wavu.

13Wantu wadya wakuleka sila zichumile,

vileke watimile sila zihiye, 14wantu wadya wakubweda kutenda wavu,

na kwelelwa kudamanya sila za wavu, 15wantu wabanikilwe mwe imijendele yawo,

sila zawo hazina ukanuni.

16Umanyi naukutende umwenege mvyele mchilanga,

akudaha kukuluvya na milosi yakwe yedi, 17mvyele yudya akumwasa mgosiwe wo udodo wakwe,

na kujala idilagano ekie kulongozi kwa Chohile ywakwe.

18Kwavia nyumba yakwe yaonyekeza kwe file,

na izisila zakwe zalongoza wantu kwita kwe idibome hedina uhelo.

19Yoyose nambase umvyele uyo, hauye mpwii! Naho haiwiye isila yo ujima.

20Ivyo waungwa utimile imiliganyo ya wantu wedi, na kutozesa imijendele ya wakanuni.

21Kwaviya wata uwagila nawenkwe isi,

na wakanuni nawekale umo.

22Mna Chohile nawause mwe isi wadya wehi,

na kuwang'ola wata masa saviya mani mwe isi.