Njelo 1

Utana wa Njelo

1Zino ni njelo za seuta Sulemani mwana chilume ywa Daudi na seuta ywa Izulaeli. 2Njelo zino zawenka wantu ubala na uchumi.

Naho ziwatenda wamanyise mana ya kukobaganya milosi ya njelo.

3Ziwatenda wadahe kwikala kwa utunyi na unyanyahala na uwagila na kutenda kwa ujejeje.

4Zawenka hewekukobaganya kukombaganya na wabwanga umanyi na wengele.

5Mta ubala azive na kongezeza umanyi wakwe, wata kubunkula wapate cha kuwalongoza, 6elo, wadaha wamanye mana ya miliganyo yefisize mwe njelo na lufyambo nalulaile.

Mahiyo kwa wabwanga na wandele

7Kumvikila Zumbe ni nkongelo yo umanyi,

mna wahezi wabela umanyi na wedi.

8Mwanagu tegeleza viya akulonga tati yako,

naho use kuyabela amahinyo ya nyokwe.

9Ayo nayakulembe saviya chilemba chikwagiza mo mtwi wako,

saviya mkufu mwe isingo yako.

10Mwanagu wata masa wakaluvya usekuzumila,

naho usekuwategeleza.

11Wakagamba, “Chite chikamnyatile mntu na kumkoma,

chikawebunge hewena mlema!

12Nachiwamele wakatenda wajima saviya mbila,

watende saviya wadya wakusela kwe idibome hedine uhelo.

13Nachiguhe ugoli wose wa yombe,

izinyumba zetu nachizimemeze vitahigwe!

14So chambizane,

na vyose nachipate nachipangane.”

15Weye mwanangu use kulongozana nawo,

kwechinde usekwita nawo.

16Kwaviya wowo wekamba kudamanya ubanasi,

kusunguza kwawo kose ni kwachausa cha kukoma wantu.

17Ni ndima ya bule kwinika lufyusa,

kuno kadege kakawona.

18Mna awantu awo wanyata na kwegwiza wenye,

wenika lufyusa na kwegwiza wenye.

19Nivyo zili sila za manyakwili,

ivyo nivyo wakwikala kwa unyakwili.

Ubala wagoneka wantu

20Ubala wetanga kwa izwi mwe isila,

walavya izwi dyakwe mwe midugano.

21Wetanga mwe sila mpanda,

walonga mwe nchili ya mzi, 22“Nyuwe wahezi! Namtende mahezi kubula ini?

Kubula ini nyuwe wata ubezi namwelelwe nu ubezi wenyu?

Na mahumbwinya waihiwa ubala?

23Tegelezani mafundo yangu, naniwenkeni umanyi wangu,

naho nani wagambileni imilosi yangu.

24Kwaviya siwetangani niyo mwalemela kunitegeleza,

siweinuilani mkono chani niwagonekeni mna mlemela, 25mbela ulangilizi wangu wose,

naho hamtimile mafundo yangu, 26elo, mkabwilwa ni nkunto, nani wasekeni.

Naho nani watileni mkabwilwa ni chihovu, 27mkawabwilwa ni nkama saviya nkung'unto, file zenyu zikawakulubanya saviya luzimu, chipindi masulumizo na nkunto zikawabwilani.

28Aho namnitange mna saniwetikeni, namnilondese mna hamnipate.

29Kwaviya mwihiwa imilosi yangu,

naho hamsagule kumogoha Zumbe Chohile, 30kwaviya mlemela ulangilizi wangu,

niyo mwabela amafundo yangu yose, 31ivyo nampate chiya namkalonda,

naho namsulmile kuligana ne izintendwa zo uwavu wenyu.

32Kwaviya wahezi wekoma kwa nkani zawo,

mahumbwinya nayo yekoma kwa kuswesa umanyi, 33Mna chila nanitegeleze nekale mpeho,

natondowale hekogoha yehiye.”