Nehemiya 9

Wantu wa Izulaeli weila amasa yawo

1Mwe idizuwa dya milongo midi na nne dyo umwezi udya wa mfungate, Waizulaeli nendile wadugana hamwenga wakafunga na kuvika suche za majuniya kuno wekupuila malumbi kwemitwi yawo kulagisa usungu kwachausa cha amasa yawo. 2Wantu wa Izulaeli niyo wepagula kulawa mwa awantu sawo Wayahudi. Niyo wachimala hantu hawo na kweila amasa yawo na wihi wa wakale wawo. 3Wasoma izisigilizi ziwandikwe mwe ichitabu cha Zumbe Chohile, Chohile ywawo kwa masa matatu na masa matatu matuhu yatimile wayajeseza kweila amasa yawo na kumvikila Zumbe Chohile, Chohile ywawo.

4Kwendaga na chilingo cha Walawi wachimale, awo wendaga ni Yeshuwa na Bani na Kadimeli na Shebaniya na Bani na Shelabiya na Bani ywa kaidi na Keneni. Awo wamlombeza Zumbe Chohile, Chohile ywawo kwa izwi kulu.

5Ivyo, vilongozi wa Walawi, Yeshuwa na Kadimeli na Bani na Hashabuneya na Shelabiya na Hodiya na Shebaniya na Petahiya niyo wawetanga awantu na kuwagamba.

“Chimalani mumtogole Zumbe Chohile ywenyu,

mtogoleni uyo mazuwa yose.

Ditogoleni idizina dyakwe dikukile.

Hata hegu hahana mntu akudaha kumtogola viya vikungwa.”

Malombezo ya kweila

6Ezila niyo agamba,

“Weye Zumbe ni weyedu Zumbe Chohile,

umbile ulanga ne imbingu hamwenga ne izintondo zose,

isi ne ivintu vyose vimndani mwakwe,

ibahali ne ivintu vyose vimndani mwakwe.

Weye wenkiza ujima kwa vyumbe vyose,

wandima wose wa kwembingu wakuvikila weye.

7Weye Zumbe Chohile umsagule Abulamu,

na kumlavya komzi wa Uli ya Wakalidayo,

niyo wamwinka zina tuhu dya Bulahimu.

8Kumuwona ni mkanuni kwako,

weye niyo wadamanya lagano naye,

kugamba awelekwa wakwe nowenke isi ya Wakanani,

neisi ya Wahiti neisi ya Waamoli,

neisi ya Wapelizi neisi ya Wayebusi neisi ya Wagiligashi.

Niyo wadichintiza kwaviya weye wimkanuni.”

9“Wawonaga amasulumizo ya awakale wetu uko kweisi ya Misili.

Wevaga idizwi dyawo umo wakwitangaga uwambize uko kwebahali ya Shamu.

10Kudamanya vilagiso vya mpituko na maula kwa Falao chilongozi ywa Misili na masekulu wa awandima wakwe na awantu wose we isi yakwe,

kwaviya wamanyaga ivyo Wamisili wawasulumize awantu wako.

Ulailo wakwe wantu wose wakumanya kubula dyelo.

11Kupagula haidi ibahali ya Shamu,

kulongozi kwawo vileke wajinke hantu hanyaile,

mna Wamisili wendile wakawatimila wamelwa ni mazi mwe mzimilizo,

saviya yuwe mwe mazi yalozize.

12Nomsi kuwalongoza kwa ingu dikwinga nguzo,

nechilo kuwalongoza kwa moto ukwinga nguzo kuwapulikila isila wakungwa wajinkile.”

13“Umo awakale wetu wakatenda wekolugulu lwa Sinai waselaga kulawa kwembingu,

na kulonga nawo.

Kuwenka malangilizo ne izisigilizi zikungwa na zachindedi, iviya kuwenka imiko na amalagizo yedi.

14Kuwahinya watoze Idizuwa dyako dikukile dyo Kuhumula,

niyo wawenka miko na sigilizi kujinkila mndima ywako Musa. 15Umo watendaga na sala, wawenkaga nkande kulawa kwembingu,

umo wakatenda na nchilu wawenkaga mazi yalaile mwe luwe.

Niyo wawagamba wengile na kuiguha isi,

welisaga kugamba nowenke.

16Mna, wakale wetu weduvyaga na kutenda na singo ndala,

awo hawatimile amalagizo yako.

17Walemela kukwiva weye, wajala yose udamanye mwawo,

ne izimpituko udamanye mwawo.

Watenda na singo ndala na mo kukuhituka weye wasagulaga chilongozi vileke wauye koutumwa wawo uko Misili.

Mna weye Chohile wimta kulekeila,

wimta ungi naho kumema wedi na mbazi,

hukusunguza kwihiwa, kumema ungi, ivyo huwalekile.

18Hata weze wadamanye tukulu dikwinga ndama,

niyo wakuhuluta wakagamba, ‘Yuno nuyo mnungu ywenyu awalavizeni kweisi ya Misili,’

watenda mbuli zikwihizisa.”

19“Kwachausa cha mbazi zako zilozize huwalekile kwedijangwa.

Nomsi diya idingu dikwinga nguzo hailekile kuwalongoza mweisila yawo,

naho moto ukwinga nguzo nechilo hailekile kuwamulikila isila waungigwe watimile.

20Kuwegaila muye wako wedi vileke uwahinye cho kudamanya.

Hulekile kuwenka mkate ukwitangwa mana ukulawa kwembingu na kuwenka mazi wakatenda na nchilu.

21Kwa mihilimo milongo mine kuwatunduliya kwedijangwa,

hawaswesize chintu chochose, suche zawo hazisakale,

naho iviga vyawo havivimbile.”

22“Weye kuwambiza wakale wetu wahude useuta ne si ntuhu zihakane nazo.

Waiguha isi ya Heshiboni alongoze seuta Sihoni,

neisi ya Bashani alongoze seuta Ogu.

23Kuwenka wakale wetu wana walozese saviya ntondo za koulanga,

weye kuwalongoza na kwingila mweisi idya uwagambile wakale wawo nowenke.

24Welekwa wawo niyo waiguha isi na kuikala.

Kuwadahiza wawahude awekazi wa Kanani nawakekala mweisi iyo.

Kuwenka udahi wantu wako wa Izulaeli wawatende seivyo wakunga wantu wa Kanani na seuta ywawo.

25Wakale wetu niyo wataha mizi yazengelwe ngome,

na si ina sanga ntana, waguha nyumba zimemile vintu vyedi vyesimile,

masima yasimbigwe kale,

nkonde za mizabibu na nkonde za mizaituni na miti ina ntunda zilozese.

Wadya na kwiguta wadamana vitendese,

webwedesa mwe vintu vyedi vilozize uwenkile.”

26“Mna hawatimile viya ulongile,

sigilizi zako wazilemela na kuzileka kunyuma kwawo.

Waoni wandile wakawafunda vileke wakuwiye weye wawakoma,

wakuhulutisa.

27Ivyo, niyo wawaleka wahudwe ni wankondo wawo wawasulumize.

Mna umo weze wasulumizwe niyo wakwilila weye uwambize,

kulawa kwembingu kuweva,

kwa mbazi zako zilozize niyo wawenka vilongozi,

wawambule kulawa mwe imikono ya awankondo wawo.”

28“Mna umo utondowazi ukawawiya,

niyo wakola masa vituhu kulongozi kwako.

Ivyo, weye niyo wawaleka walongozwe ni wankondo wawo.

Weze wakwilile vituhu niyo waweva kulawa kwembingu,

kwa mbazi zako niyo wawakombola chila nkanana.”

29“Kuwafunda vileke watimile imiko yako,

mna weduvya hawatimile amalagizo yako.

Wakola masa hawatimile izisigilizi zako yako,

hata hegu kwa kutimila izisigilizi izo kwamtenda mtu ekale vyedi,

Mna niyo watenda wankani walemela kutimila viya ulongile.

Watenda na singo ndala walemela kukwetegeleza.

30Kwa mihilimo ilozize kuwajijimiza.

Kwa sila ya Muye wako kuwafunda kujinkila waoni wako.

Mna hawajeile mwemitwi,

niyo wawaleka wahudye ni wantu we izisi ntuhu.

31Mna kwaviya weye kumema mbazi huwalekile wakomwe,

kwaviya weye Chohile kumema mbazi na wedi mta kulekeila.”

32“Mna kaula, dyelo suwe chi watumwa mwe isi uwenkile wakale wetu,

weye mkulu mta nguvu! Mta kogofya, mta kutoza lagano dyako dya ungi,

kumbuka izinkunto zino chinanazo,

mwa amaseuta wetu ne vilongozi,

mwa walavyantambiko wetu na waoni,

wakale wetu na awantu wako wose,

kukongela mazuwa ya maseuta wa Ashulu kubula dyelo.

33Kudamanya vikuwagila kuchikantila,

kutenda mkanuni, hata hegu suwe chidamanya wihi.

34Maseuta wetu na vilongozi wetu na walavyantambiko wetu na wakale wetu,

hawatimile izisigilizi zako hawatozize imiko yako,

hegu mafundo uwagambile.

35Hata umo wendile mo useuta wawo,

wakabweda wedi wako ukulise mwesi nkulu ina sanga ntana uwenkile,

hawakusankanile hegu kuhituka kulawa mwe izisila zawo zihiye chani wakusankanila weye.”

36“Mna haluse chiwatumwa mwe isi uchinkile,

ina sanga yedi ikuchinka nkande.”

37“Kwachausa cha amasa yetu, ugoli we isi ino wegalwa kwa amaseuta wikiye wachilongoze.

Wachilongoza suwe no uludimo lwetu saviya wakunga.

Suwe chimwenkuto ikulise!”

Wantu wadamanya wivano

38“Kwachausa che izimbuli zose zilaile, suwe wantu wa Izulaeli chaika wivano kwa kuwandika kutimila viya ulongile, suwe chawandika, hamwenga ne ivilongozi wetu na Walawi wetu na walavyantambiko wetu wajela mahula yawo”.