Nehemiya 10

Awo wajeile hula dya mevano

1Ywa nkongo kujela hula mwa amevano endaga sekulu Nehemiya mwana ywa Hakaliya, niyo atimila Sedekiya. 2Wakutimila ni walavyantambiko wajeile hula, Selaya na Azaliya na Yelemiya, 3na Pashuli na Amaliya na Malikiya, 4na Hatushi na Shebaniya na Maluki, 5na Halimu na Melemoti na Obadiya, 6na Danieli na Ginetoni na Baluki, 7na Meshulamu na Abiya na Miyamini, 8na Maaziya na Biligai na Shemaya. 9Mazina ya Walawi wajeile hula wendaga, Yeshuwa mwana ywa Azaniya na Binui mwelekwa ywa Henadadi na Kadimeli, 10Walawi weyawe ni Shebaniya na Hodiya Kelita na Pelaya na Hanani, 11na Mika na Lehobu na Hashibiya, 12Zakuli na Shelebiya na Shebaniya. 13Hodiya na Bani na Beninu. 14Vilongozi wa Waizulaeli wajeile hula wendaga ni Paloshi na Pahati Moabu na Elamu na Zatu na Bani. 15Buni na Azigadi na Bebai. 16Adoniya na Bigwai na Adini. 17Ateli na Hezekiya na Azuli. 18Hodiya na Hashumu na Bezai. 19Halifu na Anatoti na Nebai. 20Magipiashi na Meshulamu na Hezili. 21Meshezabeli na Sadoki na Yadua. 22Pelatiya na Hanani na Anaya. 23Hoshea na Hananiya na Hashubu. 24Haloheshi na Piliha na Shobeki. 25Lehumu na Hashabuna na Maaseya. 26Ahiya na Hanani na Anani. 27Maluki na Halimu na Baana.

Mevano

28Vikaheza, Waizulaeli wasigaile wadamanya mevano kwa kwelisa. Wadamanye ivyo ni walavyantambiko na Walawi na wamizi we Inyumba ya Zumbe na wachemi na Wanesini na awantu wose wesentile na awantu we izisi izintuhu chani watimile imiko ya Zumbe Chohile hamwenga na awavyele wawo na awana wawo na awachiche wawo wose wendile na udahi wa kumanya mbuli. 29Walungana na walukolo wawo na wakulu wawo, mwe kwika cheliso na kugamba wanabalanga icheliso chino nawaligitwe, naho welisa kugamba nawekale kwa kutimila imiko ya Chohile amlagize mndima ywakwe Musa. Nawatimile kwa ukanuni imiko na amalagizo yose ne izisigilizi za Zumbe, Zumbe ywetu. 30Chelisa kugamba hachiwaloze awachiche wetu kwa awantu wakuchizunguluka, hegu kuwaloza awana wetu wechilume kwa awachiche wawo.

31Umo wantu weizisi ntuhu wakwikala muno mwe isi wanegala mayombe hegu uhule vileke watage zuwa dya Kuhumula hegu zuwa dyodyose tuhu dikukile hachiwaguze. Chila mhilimo wa mfungate hachilime mwe sanga naho nachilekeile amatigizo yose.

32Iviya chazumila kugamba chila mhilimo nachilavye gilamu nne ya mayuwe ya chumbu kwachausa cha kusankana mwe Inyumba ya Chohile.

33Iviya nachilavye amayuwe ayo ye chumbu vileke yaguile vintu saviya mikate ikukile na malavyo ya mazwela na uhule na malavyo ya kutikimya kwachausa cha malavyo ya zuwa dya Kuhumula na ngasu za kutontomoka kwa mnenge na izingasu ntuhu zilagizwe, na kwachausa cha malavyo ya kukile na kwachausa cha malavyo ya kusa masa chani kudamanya wivano kwachausa cha Izulaeli na kwachausa che izindima zose za mwe Inyumba ya Chohile ywetu.

34Suwe walavyantambiko na Walawi na awantu, nachitowe tegatega chila mhilimo chani chimanye ni lukolo luhi lukungwa lwigale nkuni za kujimbila moto mwe imazabahu imwenyumba ya Zumbe Chohile ywetu saviya viwandikwe mwe Isigilizi.

35Iviya chelisa kugamba chila mhilimo wantu mwe izikaya nawegale malimbulo yo ulozo wetu ne izintunda za nkongo za chila mti mwe Inyumba ya Chohile.

36Naho, saviya viwandikwe mwe Isigilizi, nachiwalete awelekwa wetu wa nkongo we chilume kwa walavyantambiko wakusankana uko chani wawasente kulongozi kwa Zumbe Chohile na welekwa wa nkongo wo uludimo lwetu kugamba njeku na mabunga ya ndolome na mavulata mwe Inyumba ya Chohile ywetu, kwachausa cha walavyantambiko wakusankana uko.

37Ukaleka ayo, nachilete unga ulawane na ulozo wetu wa nkongo mwe izinkonde zetu kwachausa cha walavyantambiko, na malavyo yetu yo uhule ne izintunda ze imiti yetu yose ne idivai yetu mpya na mavuta. Nachilete mafungu ya mlongo kwa Walawi, kwaviya Walawi nawo wakuchisanya amafungu ya mlongo mwe imizi yose nachidamanye ndima. 38Mlavyantambiko mwelekwa ywa Haluni natende hamwenga na Walawi umo wakahokele amafungu ya mlongo, Walawi nawo waungwa wegale mafungu ya mlongo mwe ivyumba vyo kwikiya ivintu mwe Inyumba ya Chohile. 39Wantu wa Izulaeli hamwenga na Walawi vyaungwa wegale malavyo yawo yo uhule ne idivai impya na mavuta ye mizaituni mwe ivyumba vyo kwikiya ivintu hantu hakwikigwa ivimpandwa vya ahantu hakukile na aho wakwikala walavyantambiko wakusankana mo luzo na wamizi we Inyumba ya Chohile na awachemi.

Hachileke kuitunduliya Inyumba ya Zumbe Chohile ywetu.