Nehemiya 11

Wekazi wekale komzi wa Yelusalemu

1Elo, vilongozi wa wantu niyo wekala komzi wa Yelusalemu, wantu watuhu wose niyo watowa tegatega mntu yumwenga akulaila mwe wantu mlongo umwenga aite akekale komzi ukukile wa Yelusalemu, wadya chenda wakusigala waite wakekale kwemizi yawo wenye. 2Wantu wawatogola wadya waungile wenye wakekale ko mzi wa Yelusalemu. 3Hata ivyo, mwe imizi imituhu, wantu wa Izulaeli na walavyantambiko na Walawi na wandima mwe Inyumba ya Chohile na welekwa wa awandima wa Sulemani wajendeleza kwikala mwe isi ya Yuda, chila mntu hantu hakwe mwenye.

Luno lukutimila ni ludongo lwa vilongozi we imizi wetile kwikala komzi wa Yelusalemu. 4Kulawa mwa awelekwa we idikabila dya Yuda ne idikabila dya Benjamini wekale uko Yelusalemu ni Ataya mwana ywa Uziya mwezukulu ywa Zakaliya. Wakale wakwe watuhu ni Amaliya na Shefatiya mwana ywa Mahalaleli mwelekwa ywa Pelesi. 5Na Maseya mwana ywa Baluki mwezukulu ywa Kolihoze. Wakale wakwe watuhu ni Hazaya na Adaya na Yoyalibu mwana ywa Zekaliya mwelekwa ywa Shela.

6Welekwa wa Pelesi wekale komzi wa Yelusalemu ni magana mane milongo mtandatu na mnane, wagosi wakudaha kugomba nkondo. 7Wantu we ikaya ye idikabila dya Benjamini wasagulwe wakekale komzi wa Yelusalemu ni Salu mwana ywa Meshulamu mwana ywa Yoedi. Wakale wakwe watuhu ni Pedaya na Kolaya na Maseya na Itieli na Yeshaya, 8na walukolo waidi wa Salu, Gabai na Salai iviya wekalaga komzi wa Yelusalemu. Wantu wose chahamwenga walaile kwe idikabila dya Benjamini wekale komzi wa Yelusalemu ni wantu magana chenda milongo midi na mnane. 9Yoeli mwana ywa Zikili nuyo endaga sekulu ywawo mkulu na Yuda mwanawe dya Hasenua endaga sekulu mwambizi mo umzi wa Yelusalemu. 10Walavyantambiko wekale komzi wa Yelusalemu wendaga ni Yedaya mwana ywa Yoyalibu na Yakini. 11Selaya mwana ywa Hilikiya mwezukulu ywa Meshulamu. Wakale wakwe watuhu ni Sadoki na Melayoti na Ahitubu uyo endaga mlavyantambiko mkulu. 12Wose chahamwenga wendaga walukolo magana mnane milongo midi na waidi wasankane mwe Inyumba ya Chohile. Mlavyantambiko mtuhu ekale komzi wa Yelusalemu endaga ni Adaya mwana ywa Yelohamu mwwana ywa Peleliya. Amzi na Zekaliya na Pashihuli na Makiya. 13Wose chahamwenga vilongozi wa nkolo wendaga magana maidi milongo mine na waidi. Iviya kwendaga na Amashai mwana ywa Azaleli mwana ywa Ahizai. Wakale wakwe watuhu wendaga ni Meshilemoti na Imeli 14Kwendaga na wantu gana dimwenga milongo midi na mnane mo lukolo luno wendaga wagomba nkondo wakankalu. Chilongozi ywawo endaga ni Zabudieli mwana ywa Hagedolimu. 15Welekwa wa Walawi wekale komzi wa Yelusalemu ni Shemaya mwana ywa Hashubu mwana ywa Azilikamu. Wakale wakwe watuhu ni Hashabiya na Buni. 16Walawi waidi watuhu, Shebatai na Yozabadi, awo wendaga vilongozi wachimaile ndima za kuse kwe Inyumba ya Chohile. 17Mataniya mwana ywa Mika mwana ywa Zabudi mwelekwa ywa Asafu, uyo endaga chilongozi ywa bunga dya wachemi wakulavya ntogozi na malombezo, mwambizi ywakwe endaga ni Bakubukiya. Mtuhu ni Abuda mwana ywa Shamuwa mwana ywa Galali mwelekwa ywa Yedutuni.

18Chahamwenga Walawi wekale komzi ukukile wa Yelusalemu wendaga magana maidi milongo mnane na wane. 19Wamizi we izinchili ze Inyumba ya Chohile wendaga ni Akubu na Talimoni na walukolo wawo watuhu chahamwenga wendaga wantu gana dimwenga milongo mfungate na waidi.

20Waizulaeli wasigaile hamwenga na walavyantambiko na Walawi nawekala kwemizi yawo wenye uko Yuda chila mntu hantu ha tati yakwe. 21Mna awandima we Inyumba ya Chohile wekalaga kwa kagulu ka Ofeli uko Yelusalemu. Ziha na Gishipa nawo wendile vilongozi wawo.

22Mkulu ywa Walawi uko komzi wa Yelusalemu endaga ni Uzi mwana ywa Bani mwana ywa Hashabiya. Wakale wakwe watuhu wendaga ni Mataniya na Mika. Uzi endaga ni yumwenga mwa awelekwa wa Asafu, awo ndima yawo yendaga ni kusankana kuchema mwe Inyumba ya Chohile. 23Seuta nendile kalagiza kuwalanga izinkolo zitende na luzo lwa kulongoza kuchema chila zuwa mwe Inyumba ya Chohile ne ivintu wakungwa wadamanye.

24Petahiya mwana ywa Meshezabeli yumwenga ywa welekwa wa Zela we idikabila ywa Yuda, uyo endaga akachimala hantu ha seuta mwe mbuli zose za wantu wa Yuda.

Wantu mwe imizi mituhu

25Wantu wasiku wadya hewekale komzi wa Yelusalemu, awo wekala kwevijiji hajihi ne izinkonde zawo. Wantu walaile mwe idikabila dya Yuda wekalaga mwe vijiji vizunguluke mwe imizi ya Kiliati Aliba na Diboni na Yekabuzeli. 26Wamwenga wekalaga komzi wa Yeshuwa na Molada na Beti Peleti, 27komzi wa Hazali Shuali na komzi wa Beli Sheba ne ivijiji vyakwe. 28Watuhu wekalaga kwemizi ya Zikilagi na Mekona ne ivijiji vihajihi nayo, 29na Eni Limoni na Zola na Yalimuti, 30na Zanoa na Adulamu ne ivijiji vihajihi ne imizi iyo. Iviya wekalaga Lakishi na mwezinkonde zihajihi na Azeka na ivijiji vyakwe. Ivyo nikugamba wantu wa Yuda wekalaga kukongela Beli Sheba ntendele ya kwamwenyemzi na kwedibwandasi dya Hinomu ntendele ya chenya.

31Welekwa wa Benjamini wekalaga kwe imizi ya Mikimashi na Ai na mzi wa Beteli ne ivijiji vihajihi nayo. 32Iviya wekalaga kwemizi ya Anatoti na Nobu na Ananiya. 33Mwemizi ya Hazoli na Lama na Gitaimu. 34Mwemizi ya Hadidi na Zeboimu na Nebalati. 35Mwemizi ya Lodi na Ono na mwedibwandasi dya wantu Mafundi. 36Mabunga masiku ya welekwa wa Walawi nawakekala komzi wa Yuda wakahangana na wantu we idikabila dya Benjamini.