Nehemiya 12

Ludongo lwa Walavyantambiko na Walawi

1Wano wakutimila ni walavyantambiko na welekwa wa Walawi wawiye kulawa ko usamizo hamwenga na Zelubabeli mwana ywa Sheliteli hamwenga na mlavyantambiko mkulu Yoshuwa kulawa Babeli kwiza Yelusalemu.

Awo wendaga, Selaya na Yelemiya na Ezila. 2Amaliya na Maluki na Hatushi. 3Shekaniya na Lehumu na Melemoti. 4Ido na Ginetoni na Abiya. 5Miyamini na Moadi na Biliga. 6Shemaya na Yoyalibu na Yedaya. 7Salu na Amoki na Hilikiya na Yedaya. Wose awo wendaga vilongozi wa walayantimbiko chipindi Yeshuwa akatenda ni mlavyantambiko mkulu. 8Yano yakutimila ni mazina ya Walawi wendile vilongozi wa wachemi wa nchemo za ntogozi, Yeshuwa na Binui na Kadimieli na Shelebiya na Yuda hamwenga na Mataniya. 9Bakibuya na Uni na welekwa watuhu wa Walawi nawakachimala mpezo mwawo wakaisana kuchema umo wantu wakavika.

Welekwa wa mlavyantambiko mkulu Yeshuwa

10Yeshuwa endaga ise dya Yoiakimu, Yoiakimu endaga ise dya Eliyashibu, Eliyashibu endaga ise dya Yoyada. 11Yoyada endaga ise dya Yonasani na Yonasani endaga ise dya Yadua.

Wakulu wa nkolo za walavyantambiko

12Umo Yoakimi endaga Mlavyantambiko Mkulu, kwendaga na vilongozi wa nkolo za walavyantambiko. Melaya kulawa lukolo lwa Selaya na Hananiya kulawa lukolo lwa Yelemiya. 13Meshulamu kulawa lukolo lwa Ezila, Yehohanani kulawa lukolo lwa Amaliya. 14Yonasani kulawa lukolo lwa Maluki na Yusufu kulawa lukolo lwa Shebaniya. 15Adina kulawa lukolo lwa Halimu na Helikai kulawa lukolo lwa Melayoti. 16Zekaliya kulawa lukolo lwa Ido na Meshulamu kulawa lukolo lwa Ginetoni. 17Zikili kulawa lukolo lwa Abiya, iviya kwendaga na chilongozi kulawa lukolo lwa Miyamini na lukolo lwa Maaziya na lukolo lwa Pilitai kulawa lukolo lwa Moadiya. 18Shamuwa kulawa lukolo lwa Biligai, Yehonasani kulawa lukolo lwa Shemaya. 19Metenai kulawa lukolo lwa Yoyalibu, Uzi kulawa lukolo lwa Yedaya. 20Kalai kulawa lukolo lwa Salu, Ebeli kulawa lukolo lwa Amoki. 21Hashabiya kulawa lukolo lwa Hilikiya na Netaneli kulawa lukolo lwa Yedaya.

Wantu we izikaya za walavyantambiko na Walawi

22Mwe mihilimo Eliyashibu na Yoyada na Yohanani na Yaduwa wendaga Walavyantambiko Wakulu, kwawandikagwa ludongo lwa mazina ya nkolo za welekwa wa Walawi. Ludongo ulo lwadumaga kuwandikwa umo Dalio eze atende seuta ywa Uwajemi. 23Wakulu wa nkolo za welekwa wa Walawi wawandikwa mwe chitabu cha lukumbusa kubula Yohanani mwezukulu ywa Eliyashibu akatenda Mlavyantambiko Mkulu.

Kuhokelezana ndima mwe Inyumba ya Chohile

24Vilongozi wa Walawi wendaga ni Hashabiya na Shelebiya na Yeshuwa na Binui na Kadimeli. Walawi awo waikwa mwe mabunga maidi, mabunga ayo nendile yakasinyana mo kuchema nchemo za ntogozi na kuhongeza saviya alagize seuta Daudi mntu ywa Chohile. 25Wamizi wendile wakamila kwe izinchili ze inyumba yo kwikiya vintu wendaga ni Mataniya na Bakibukiya na Obadiya na Meshulamu na Talimoni na Akubu. 26Wasankana mwe indima iyo umo Yoakimu mwana ywa Yeshuwa mwezukulu ywa Yozadaki akatenda nuyo Mlavyantambiko Mkulu na Nehemiya nuyo sekulu mwe isi, na Ezila nuyo mlavyantambiko na mta kuwandika.

Nehemiya asenta ichiwambaza chomzi

27Umo ichiwambaza chomzi wa Yelusalemu chikasentwa, Walawi wezaga kulawa uko na wakekala walungana na suwe mo kudamanya ingasu kwa mbwedo wo kusentwa ichiwambaza. Chiwagamba wacheme nchemo za ntunyo na ntogozi wakajeseza magunda na visindamgunda na mazeze. 28Iviya wachemi wechisanywa kulawa umo na wakekala kuzunguluka umzi wa Yelusalemu na ivijiji vyo umzi wa Netofati, 29kulawa Beti Giligali na kulawa Geba na Azimaweti. Wachemi awo wazengaga vijiji wekale kuzunguluka umzi wa Yelusalemu. 30Walavyantambiko na Walawi weze waheze kwekukukiza saviya vili amazwela yawo niyo wawakukiza wantu ne izinchili ne ichiwambaza. 31Niyo nawachisanya vilongozi wa Yuda wakwele kulanga kwechiwambaza. Niyo nalagiza mabunga maidi makulu ya wachemi wacheme nchemo za kumtogola Chohile. Bunga dimwenga dikwele mlanga mwe chiwambaza wajende ntendele ya kulume kuhinga kweinchili ya Kwedizala. 32Hoshaya ne inusu ye ivilongozi wa Yuda wawatimila mnyuma awachemi. 33Waalavyantambiko wano, Azaliya na Ezila na Meshulamu wawatimila mnyuma wakavila magunda, 34Yuda na Benjamini na Shemaya na Yelemiya. 35Vikaheza niyo atimila Zekaliya mwana ywa Yonasani mwezukulu ywa Shemaya. Wakale wakwe watuhu ni Mataniya na Mikaya na Zakuli mwana ywa Asafu. 36Kunyuma kwawo nendile wakatimilwa ni welekwa watuhu wo ulukolo lwa Zekaliya. Shemaya na Azaleli na Milalai na Gilalai na Maai na Nesaneli na Yuda na Hanani. Wose awo nendile wenula vimpandwa vya kuchemela, saviya ajeseze Daudi mntu nywa Chohile. Ezila mta kuwandika nuyo alongoze idibunga idyo. 37Kweinchili ye Sokwe wajendeleza ulo na ulo wabula kweizintantilo kuhinga komzi wa Daudi niyo wajinka idizumba dye chiseuta dya Daudi kubula kwe Inchili ya Amazi ntendele ya ulailo wa zuwa. 38Bunga dya kaidi dya wachemi dihinga ntendele ya kumoso. Siwatimila mnyuma chikatenda mlanga mwe ichiwambaza, hamwenga ne inusu ya awantu mnyuma mo mnala we Iditanuli kubula kwe Ichiwambaza Changalamu. 39Kulawa aho chihinga kujinkila Kweinchili ya Efulaimu ne Inchili ya Yeshana ne Inchili ya Samaki na komnala wa Hananeli no mnala wa wagombankondo Gana, kubula kweinchili ye Izingoto. Weze wabule Kweinchili yo Wamizi niyo wachimala. Chibindiliza ukujenda kwetu hajihi ne Inchili ikuhinga kwe Inyumba ya Chohile. 40Mabunga yadya amaidi ya awachemi yabula kwe Inyumba ya Chohile na kujendeleza kumtogola chila dimwenga niyo dyachimala hantu hakwe, miye hamwenga ne inusu ye ivilongozi. 41Mwedibunga dyangu walavyantambiko wendile wakatowa magunda yawo ni Eliyakimu na Maaseya na Miniamini na Mikaya na Elioenai na Zekaliya na Hananiya. 42Watuhu watimile ni Maaseya na Shemaya na Eliazali na Uzi na Yehohanani na Malikiya na Elamu na Ezeli. Mabunga ayo yachema kwa izwi kulu wakalongozwa ni Yezilahiya.

43Zuwa idyo wantu walavya ntambiko zilozize wakatenda wamema mbwedo kwaviya Chohile kawenka mbwedo ukulise. Iviya wavyele na wana welunga hamwenga nawo mo mbwedo uwo. Chizumo cho mbwedo we ngasu chivika hale vitendese.

Kwemalanya kwachausa cha mviko mwe Inyumba ya Chohile

44Chipindi icho wantu wasagulwa chani wachimaile ivyumba vyo kwikiya nchango nazilavigwe mwe Inyumba Ya Chohile na malimbulo na mafungu ya mlongo. Kulawa kweizinkonde zizunguluke umzi nawakaungwa wegale malavyo mwe ihazina saviya vilagizwe mwe isigilizi kwachausa cha walavyantambiko na Walawi. Wantu wose wa Yuda nendile welelwa ni indima naikadamanywa ni walavyantambiko na Walawi, 45kwaviya wadamanya mviko wa kwetenda wazumilike kumvikila Chohile, wachemi na wamizi we inchili nawo wadamanya seivyo kuligana ne idilagizo dya Daudi na mwanawe Sulemani. 46Kukongela chipindi Daudi akatenda seuta na Asafu akatenda chilongozi ywa wachemi, wachemi nendile wakawalongoza wantu kuchema nchemo za kumtunya na kumtogola Chohile. 47Ivyo, mwamazuwa ayo Zelubabeli na Nehemiya wakatenda vilongozi, wantu wose wa Izulaeli chila zuwa walavya malavyo kwachausa cha wachemi na wamizi we izinchili. Iviya wasenta fungu tuhu kwachausa cha Walawi, Walawi nawo niyo wasenta fungu kwachausa cha welekwa wa mlavyantambiko Haluni.