Nehemiya 13

Waizulaeli wawapagula Wajeni

1Umo ichitabu che Isigilizi ya Musa chize chisomwe kwa izwi kulu mwa wantu wose, niyo wabwila hantu hawandikwe kugamba havikungwa Waamoli hegu Mmoabu watendeke mo mdugano wa awantu wa Chohile. 2Kwaviya wantu wa Amoni na Wamoabu hawawenkile nkande na mazi Waizulaeli umo wakatenda mweisila wakalawa kweisi ya Misili, hantu hakwe wamfumbasa hela Balamu vileke awaligite wantu wa Izulaeli. Mna Chohile ywetu kahituila ligito ditenda ujimbiko. 3Ivyo wantu wa Izulaeli weze weve ulosi uwo we Isigilizi niyo wawapagfula wantu wose sawo Waizulaeli wamlawe mwawo.

Nehemiya achulusa mbuli uhya

4Zuwa idyo dye ingasu hedinati, mlavyantambiko Eliyashibu mta kuchimaila vyumba vyo kwikiya vintu mwe Inyumba ya Chohile ywetu, uyo nendile ni mbuya vitendese na Tobiya mnkondo ywetu. 5Eliyashibu amlekeilaga Tobiya kujeseza chumba chikulu, chumba icho mwe nkongo nendile kikajesezwa kwikiwa malavyo ya uhule na ufumba na viya vye Inyumba ya Chohile, hamwenga na fungu dya mlongo dya uhule na divai mpya na mavuta walagizwe Waizulaeli wawenke Walawi na wachemi na wadimi we Inyumba ya Chohile hamwenga na malavyo ya walavyantambiko. 6Mna umo Tobiya akajeseza ichumba icho miye nendile sikuli komzi wa Yelusalemu, kwaviya mo mhilimo wa milongo mitatu na midi yo ulongozi wa Atashasita seuta ywa Babeli nendile suya kwa seuta kulawa Yelusalemu, mazuwa majeche yeze yomboke niyo namweila seuta anileke nuye vituhu Yelusalemu, vyaleka anilekeila nite. 7Nize niye Yelusalemu naho nibunkule imbuli iyo yo wihi Eliyashibu adamanye ya kumwinka Tobiya chumba mwe izinyuwa ze Inyumba ya Chohile. 8Niyo nehiwa vitendese, navidula kuse iviya vyose vya Tobiya. 9Silagiza ivyumba vikukizwe ne ivimpandwa vye Inyumba ya Chohile, hamwenga na amalavyo yo uhule na ubani, vize viheze niyo navivuza mndani. 10Iviya niyo nabunkula kugamba mafungu yaungigwe wenkigwe Walawi nendile hawakwinkwa, iviya Walawi wose na wacheni wendile wakaungwa wasankane mwenyumba ya Chohile wauya Yelusalemu na kwita kwezinkonde zawo, kwaviya wantu wa Izulaeli nendile hawakuwenka vintu nawakaungwa wawenke. 11Niyo nawakwamila masekulu na kuwauza, “Nimbwani Inyumba ya Chohile ihufywa?” Niyo nawetanga Walawi na wachemi nawavuza vituhu mwe indima yawo yo kusankana mwe Inyumba ya Chohile. 12Vikaheza wantu wose wa Yuda niyo wakonga vituhu kuleta mafungu yawo ya mlongo yo mpuluzi na divai mpya na mavuta ya mazaituni mwe ihazina ye Inyumba ya Chohile. 13Niyo nawasagula mlavyantambiko Shelemiya na Sadoki mta kuwandika na Mlawi akwitangwa Pedaya watende wachimaila we impamba naho simsagula Hanani mwana ywa Zakuli mwezukulu ywa Mataniya atende mwambizi ywawo, kwaviya wantu wano wawoneka kutenda wakanuni, wenkigwa ndima ya kuwapangila vintu wandima weyawe. 14Weye Chohile ywangu nikumbuka kwa dino nidamanye, usekujala chiya nidamanye kwa ukanuni kwachausa che Inyumba yako na kuvuza uhya izimbuli viya zikungwa zitende. 15Mwa amazuwa ayo siwona wantu wasiku mweisi ya Yuda wadamanya ndima ya kufumbula zabibu mwe idizuwa dyo Kuhumula, wegala mpuluzi wakwezize mwe mpunda hamwenga na divai na zabibu na ntunda zikwitwangwa tini na mavunje matuhu yesimile. Awo nawakegala ivyo vyose komzi wa Yelusalemu mwedizuwa dyo Kuhumula. Elo, niyo nawafunda wasekutaga chintu chochose mwe idizuwa idyo dyo Kuhumula. 16Iviyo siwona wantu wasiku kulawa komzi wa Tilo wendile wakekala Yelusalemu wegale samaki zilozize na vintu vyesimile na kuwatagila wantu wa Yuda na Yelusalemu mwe idizuwa dyo Kuhumula. 17Ivyo, niyo nawakwamila masekulu wa Yuda nawagamba, “Ni wihi wani uno mkudamanya wa kuhuluta zuwa dyo Kuhumula? 18Togolani wakale wenyu hawadamanye mbuli seizo na kuhosa Chohile ywetu egale file mwetu na mo mzi uno? Haluse mchei mwamsonga maya mwa Waizulaeli kwa kuhuluta zuwa dyo Kuhumula.” 19Ivyo niyo nalagiza kugamba izinchili zo umzi wa Yelusalemu zivugalwe chila chikabula chisingi cha zuwa dyo Kuhumula chiza chikakonga, naho zisekuvugulwa kubula zuwa dyo Kuhumula diheza. Niyo naika wantu wangu wasiku mwe izinchili nawamanye kugamba hahana mafulutundu yoyose nayengizwe mndani mo mzi mwe idizuwa dyo Kuhumula. 20Nkanana imwenga hegu mbili wachuluzi na wata kutaga mayombe wagona kuse komzi wa Yelusalemu. 21Mna niyo nawafunda nawagamba, “Nimbwani mkugona hajihi ne ichiwambaza? Hegu mnadamanya seivyo vituhu nawakantilani.” Kukongela aho hawezile vituhu zuwa dyo Kuhumula. 22Haheza niyo nawalagiza Walawi wetende wazumilike kwa Chohile chani waite wakamile izinchili watunduliye idizuwa dyo Kuhumula ditende dikuka.

Weye Chohile ywangu nikumbuka naho kwachausa ya chino nidamanye, unilagise wedi wako kuligana na ungi wako mkulu. 23Ukale ayo, iviya siwona wantu wa Yuda wendile wasola wavyele kulawa Ashidodi na Amoni na Moabu. 24Inusu ya awana wawo nendile wakalonga Chiashidodi hegu longa dya wantu watuhu, wadunduga kulonga idilonga dyetu dye Ichiyahudi. 25Siwakwamila na kuwaligita. Wantu wasiku siwatowa na kuwang'ola izifili zawo. Niyo nawawapiza kwa zina dya Chohile kugamba, Msekuwaloza wachiche wenyu kwa wabwanga wawo hegu wachiche wawo wasekusolwa ni wabwanga wenyu hegu nyuwe wenye msekusola kwawo. 26Siwagamba, “Togolani seuta Sulemani hakoile masa kwachausa cha wavyele saviya awo. Mgati izisi zilozize hakwendaga na seuta akwinga uyo. Nakaungiswa ni Chohile ywakwe. Chohile naye kamtenda seuta mweisi yose ya Izulaeli, mna wavyele we izisi ntuhu wamtenda uyo naye akole masa. 27Togolani, mwafanyanya kugamba suwe chitimile ivyo mdamanye nyuwe, chisekumwiva Chohile ywetu kwa kusola wavyele wajeni wakuvikila matukulu?”

28Mwana yumwenga ywa Yoyada mwana ywa Eliyashibu mlavyantambiko mkulu nedile kasola mchiche ywa mnkondo ywetu Sanibalati kulawa komzi wa Beti Holoni. Miye niyo nambalaza amlawe mo mzi wa Yelusalemu.

29Weye Chohile ywangu, usekuwajala kwaviya wajela uzavu ulavyantambiko ne idilagano dyo ulavyantambiko na dya Walawi.

30Ivyo niyo nawatenda wantu wazumilike kwa Chohile kulawana na chintu chochose cha chijeni na kuwenka walavyantambiko na Walawi chila yumwenga mwe ndima yakwe. 31Iviya sikombaganya kugamba wantu wegala nkuni mwe chipindi chikungwa na malimbulo mwe chipindi chakwe.

Weye Chohile ywangu usekujala yano nidamanye, nijimbika kwa yano nidamanye.