Esita 1

Malikiya Vashiti ahiga lagizo dya seuta Ahasuelo

1Seuta Ahasuelo alongozaga mwe mikowa gana dimwenga milongo midi na mfungate mo useuta wakwe, kulawa India kubula Kushi, kugamba Isiopia. 2Umo akalongoza yeye mwenya nakekala komzi wa Shushani.

3Mo umhilimo wa katatu wo ulongozi wakwe, seuta Ahasuelo awadamanyizaga ngasu ivilongozi na amasekulu na masekulu wa wagomba nkondo wa Pelisia na Mediya wendaga wantu wakutunyiswa na wakulu wa mikowa na wana wa maseuta. 4Ivyo, kwa chipindi cha myezi mtandatu, seuta Ahasuelo nendile akalagisa ugoli wakwe ukulise wo useuta na ukulu wo ulongozi wakwe.

5Mazuwa ayo ye ngasu yeze yaheze, seuta kajendeleza kuwadamanyiza ngasu awantu wose wo umzi umkulu wa Shushani, wakulu kwa wadodo. Ngasu iyo idamanyika kwa mazuwa mfungate, idamanyikila mwe iviwasa vye idizumba dye chiseuta. 6Hantu aho nendile hahambwa kwa mapaziya ya vitambala ving'aile vya pamba na vitambala vibuluu. Mapaziya ayo nendile yasumilwa madanga ya mayuwe ya chumbu kwa sigi zedi za kitambala chijeligwe langi izambalau na kunemenezwa mwe nguzo za mayuwe zimamatizwe malumalu. Makochi ya zahabu na mayuwe ya chumbu nendile yekigwa mwesakafu idamanywe kwa wayuwe wa langi na malumalu na mafilisipa na mayuwe matuhu ya yombe kulu. 7Wantu wenkigwa vintu vya kunywa mwe viya vya zahabu, chila chiya chesimana na chiya chituhu, seuta nendile ana chisekwesekwe chitendese ne idivai ye ichiseuta. 8Chila mntu kanywa niyo ehukwa, seuta nendile kawalagiza awandima we idizumba dye chiseuta amwinke chila mntu anywe viya akunga. 9Mwe ichipindi icho, Malikiya Vashiti naye nakawadamanyiza wavyele ngasu mndani mwe idizumba dye ichiseuta dya Ahasuelo.

10Zuwa dya mfungate dye ingasu iyo, seuta Ahasuelo akatenda kasangala moyo kwachausa che idivai anywele, niyo etanga wandima wakwe mfungate wakumsankanila yeye mwenye du, awo wendaga wafuntwa, Mehumani na Bizita na Halibona na Bigita na Abagita na Zetali na Kalikasi. 11Kawalagiza awandima wakwe awo wakamguhe malikiya Vashiti wamwigale kwakwe akatenda kavika ichilemba chakwe cho umalikiya komtwi. Malikiya uyo endaga mtana vitendese, ivyo seuta nendile akaunga awalagise awajeni wakwe ne ivilongozi utana wa malikiya. 12Mna awandima awo weze wamgambile malikiya idilagizo dya seuta, Vashiti niyo alemela kwita. Mbuli iyo imwihiza seuta vitendese, niyo amema maya mo moyo.

13Kwaviya yendaga mazwela ya seuta kuza ulangilizi kulawa kwa wata ubala, ivyo niyo awetanga walahi na walamuzi vileke wamlangilize cho kudamanya. 14Walangilizi wakwe wakumlangiliza chila nkanana ni Kalishena na Shetali na Adimata na Talishishi na Malesi na Malisena na Memukani, vilongozi mfungate wa Uwajeni na Mediya wendile maseklu vitendese mo useuta wakwe. 15Niyo awauza vino, “Togolani, kuligana na isigilizi, malikiya Vashiti atendwe vivihi? Kwaviya nasiwasigila awandima wangu kwakwe, mna yeye kalemela kutimila idilagizo dyangu miye seuta Ahasuelo!” 16Aho, Memukani niyo amgamba seuta, ne ivilongozi wakwe, “Akaleka kumbela seuta, malikiya Vashiti kawabela amasekulu na chila mntu mwe imikowa ya seuta Ahasuelo! 17Mbuli ino atendile malikiya Vashiti inamanyika mwa awavyele wose, nawo nawawabele wagosi zawo, wakagamba, ‘Seuta Ahasuelo nakalagiza malikiya Vashiti aite kwakwe, mna yeye niyo alemela.’ 18Vino dyelo wavyele wa awakulu wa Uwajemi na Mediya awo wevile ivyo adamanye malikiya Vashiti, nawatende wawagambila amasekulu wawo, ivyo ubezi na nkumbizi navimeme chila hantu. 19Elo, hegu vyakuwagila, weye seuta, lagiza vino haluse Vashiti asekwiza vituhu kulongozi kwako. Lagizo idyo diwandikwe mwe izisigilizi za Uwajemi na Mediya, chani inasekuhituilwa. Vikaheza, umalikiya enkigwe mvyele mtuhu akuwagila kujinka yeye. 20Ivyo, gong'ondo dye idilazo dinatambaliswa mweisi yose ukulongoza, chila mvyele namtunye mgosiwe, atende ni mgoli hegu ni mchiwa.”

21Seuta na amasekulu wawagizwa vitendese ni izifanyanyi izo zilavigwe ni Memukani. 22Ivyo, seuta niyo egala baluwa chila hantu ho useuta wakwe, chila hantu kwa kuwandikwa kwawo na longa dyawo wenye, akatambalisa kugamba, chila mgosi atende na udahi mwa mkaziwe.