Esita 2

Esita atendwa malikiya

1Nyumani, amaya ya seuta Ahasuelo yeze yasile, niyo amkumbuka unkani wa Vashiti, atenda afanyanya mwe unkani wakwe ne inkancho alagize iguhigwe mwakwe. 2Ivyo, wandima wakwe wasiku wendile wakamsankanila yeye mwenye, wamlangiliza kugamba, “Kuna wandele wali watana walozize hewenati kumanya mgosi, ni mbwani usekulondelwa yumwenga atende malikiya? 3Wadaha usagule masekulu mwe chila mkowa wo useuta wako na kuwalagiza wawalete awandele wose awatana mwe gane dya awavyele hano homzi umkulu wa Shushani. Wakaheza waikwe wakakaulwa ni Hegai mndima akukaula awavyele wako, awo wenkigwe mavuta na vimpandwa vituhu vileke wahikilize kwehamba. 4Yudya na kuwagile vitendese asagulwe atende malikiya hantu ha Vashiti.”

Seuta kawona ulangilizi uwo ni wedi, niyo adamanya seivyo.

5Komzi wa Shushani kwendaga na mntu yumwenga Myahudi zina dyakwe naketangwa Modekai mwana ywa Yaili mwana ywa Shimei mwana ywa Kishi kulawa kwe idikabila dya Benjamini. 6Modekai endaga yumwenga mgati mwa awantu watahigwe umo seuta Yekoniya wa Yuda atahigwe ni seuta Nebukadineza ywa Babeli. 7Modekai endaga na mwihwawe akwitangwa Esita, zina dyakwe dye Chiebulaniya nuyo Hadasha. Esita endaga mndele mtana isula yakwe na ivyo aumbigwe. Welesi wakwe weze wabanike, Modekai niyo amguha Esita na kumlela saviya mchiche ywakwe.

8Lagizo dya seuta dize ditambaliswe molumpe, wandele walozize niyo wegalwa komzi umkulu wa Shushani. Iviya, Esita naye kegalwa kweidizumba dya seuta, aikwa alelwe ni Hegai yudya akutunduliya wavyele. 9Hegai niyo awagizwa vitendese ni Esita vyaleka amhingiza. Hakawile kumwinka Esita mavuta na nkande yesimile. Iviya niyo amsamiziza hantu hatana vitendese mwe idigane idyo dya awavyele, niyo amsaguila wandima mfungate wa chivyele kulawa kwedizumba dye chiseuta dya seuta wamsankanile.

10Esita nendile helavyanye ulukolo lwakwe hegu idikabila dyakwe, kwaviya Modekai nendile kamfunda asekudamanya ivyo. 11Chila zuwa Modekai nendile akajendajenda kulongozi ko uwa we inyumba iyo vileke amanye ivyo Esita eli ne izimbuli zikunga zimlaile.

12Chipindi cha awandele awo kwehamba nakweika untanda nendile ni mhilimo umwenga. Myezi mtandatu ya nkongo wajeseza mavuta yakwitangwa manemane na myezi mtandatu ya kaidi wajeseza mavuta ya kupwepweleka na mavuta matuhu. Wakalawa aho chila yumwenga ichedu nendile akegalwa kwa seuta Ahasuelo. 13Chipindi cha kwita kwa seuta, chila mndele nendile akenkigwa chochose naunge aguhe kwachausa cho kwehamba kulawa mwe idigane idyo dya awavyele aite nacho kwe idizumba dya seuta. 14Chisingi nicho ichipindi cho kwita, mtondo wakwe mndele uyo nakegalwe kwenyumba ntuhu ya wavyele ikukaulwa ni Shaasingazi, mndima towashi akuchimaila wasuntaviya wa seuta. Mndele nahekungwa kuya kwa seuta, mafani hegu seuta kawagizwa nuyo vikuleka alagize etangwe kwa zina.

15Chipindi cha Esita kwita kwa seuta niyo chabula. Mndele uyo mwana ywa Abihaili, mwihwawe dya Modekai halombeze chintu chochose ukaleka viya enkingwe ni Hegai, mndima akukaula awavyele wa seuta. Chila mntu amuwone Esita kawagizwa nuyo. 16Elo, Esita niyo egalwa kwe idizumba dya seuta momhilimo wa mfungate mo useuta wa Ahasuelo, mwezi wa mlongo ukwitangwa Tabeti. 17Seuta kawagizwa vitendese ni Esita kujinka wavyele awatuhu wose. Esita kaungiswa kujinka awandele wose. Ivyo, seuta niyo amvisa chilemba cho umalikiya komtwi, amtenda malikiya hantu ha Vashiti. 18Vikaheza, seuta niyo adamanya ngasu nkulu kwa ntunyo ya Esita, kawagoneka masekulu na awandima wakwe wose. Kalavya majeleko yalozize kuligana no ukulu wakwe we ichiseuta.

Modekai amhonya seuta

19Umo awandele wachisanyike nkanana ya kaidi, Modekai nendile kasagulwa ekala homwingilo wa seuta. 20Esita nendile hanati kwelavyanya ulukolo lwakwe hegu idikabila dyakwe saviya Modekai amfundile asekudamanya ivyo, Esita kamwetegeleza Modekai saviya nakamwetegeleza mo udodo wakwe umo akamlela.

21Umo Modekai ekale homwigilo wa seuta, Bigitana na Teleshi wandima waidi wa seuta wendile wamizi we izinyivi mwevyumba vya seuta, nawehiwa vyaleka wadya njama wamkome seuta Ahasuelo. 22Modekai kabunkula iyo injama niyo amgambila malikiya Esita, Esita niyo akumgambila seuta. 23Uzuza mwe imbuli iyo wize udamanywe niyo vyabunkuka kugamba ni chindedi, ivyo awantu awo awaidi niyo wanyulikwa momti wo kukomela, seuta niyo alagiza imbuli iyo iwandikwe mwe ichitabu cho lukumbusa lwa mbuli zilaile kulongozi kwa seuta.