Esita 3

Hamani adya njama awakome Wayahudi

1Mbuli izo zize zijinke, seuta Ahasuelo niyo amwinka usekulu Hamani, kamtenda wazili mkulu. Hamani endaga ni mwana ywa Hamedata lweleko lwa Agagi. 2Seuta kalagiza masekulu wose wakumsankanila wamtunye Hamani kwa kumwinamila na kumfikila madi. Mna Modekai hamwinamile hegu kumfikila madi. 3Masekulu wasiku wendile howingilo wa seuta niyo wamuza Modekai, “Kwambwani weye hukutimila idilagizo dya seuta?” 4Chila zuwa nawakalonga naye aleke ubezi wakwe uwo, mna Modekai hawazumile. Kalemela kutenda ivyo, kwaviya ni Myahudi, elo hakudaha kumfikila madi Hamani. Ivyo, niyo wamgambila Hamani chani wakaule hegu nadahe kumjijimiza Modekai mweimbuli yakwe iyo. 5Hamani niyo emukwa ni maya eze amanye kugamba Modekai hakumwinamila hegu kumfikila madi. 6Naho, eze abunkule kugamba Modekai ni Myahudi, niyo awona kugamba kumkantila uyodu havikuchinta. Ivyo, niyo adya njama awakome Wayahudi wose, wantu wo ulukolo lwa Modekai wakwikala mo useuta wa Ahasuelo.

7Mo mhilimo wa mlongo umwenga na midi yo useuta Ahasuelo mo mwezi wa nkongo ukwitangwa Nisani, Hamani niyo alagiza didamanyike tegatega dikwitagwa pulimu, kwika idizuwa no mwezi umo nadamanye injama yakwe iyo. Elo, tegatega idyo niyo dyagwela mwe idizuwa dya mlongo na nne dyo mwezi wa mlongo na mbili ukwitangwa Adali.

8Ivyo, Hamani niyo amgamba seuta, “Kuna wantu wasiku wazagale chila hantu mweisi mo useta wako, naho chila mkowa weyuko. Awantu awo imiko yawo yesimana vitendese ne imiko chinanayo suwe. Ukaleka ayo wowo hawakutimila imiko yako, ivyo havikwambize chochose ukawajijimiza. 9Ukaunga, weye seuta, lavya lagizo awantu awo wakomwe. Miye nakwelisiza, unalagiza ivyo, nanilavye tani magana matatu milongo mfungate na shano za mayuwe ya chumbu yaikwe kwechumba cho kwikiya izimpamba cha seuta kwachausa cha awantu nawadamanye indima iyo.”

10Seuta niyo avula impete yakwe, iyo ikujesezwa kujela hula, niyo amwinka mnkondo ywa Wayahudi Hamani mwana ywa Hamedata wo lweleko lwa Agagi. 11Seuta niyo amgamba Hamani, “Izihela zako sigala nazo, jeseza ivyo ukunga.”

12Ivyo, zuwa dya mlongo na ntatu dyo mwezi wa nkongo, Hamani niyo awetanga wata kuwandika wose wa seuta, kawenka lugong'ondo ludya aungile lutapitwe mwe chila longa na mwechila vikuwandikwa mo useuta uwo, vikaheza baluwa izo zigalwe kwa amasekulu wose na wakulu we imikowa yose na ivilongozi wa amakabila yose kuligana na idilonga wakujeseza kulonga mwawo. Ulosi uwo ulavigwa kwa zina dya seuta Ahasuelo na kujelwa hula kwa mpete yakwe. 13Wanangwa niyo wazigala izibaluwa izo chila mkowa wimouseuta uwo. Ulosi uwo ugamba, kwa zuwa dimwenga du, kugamba zuwa dya mlongo na ntatu dyo mwezi wa mlongo na mbili ukwitangwa Adali, Wayahudi wose wabwanga kwa wadalahala, wavyele na wana wose wakomwe, wakomwe chakumbago na ugoli wawo wose uguhigwe. 14Baluwa iyo naikaungwa ilavigwe molumpe mwe chila mkowa, chani chila mntu emalanye kwachausa che idizuwa idyo.

15Kwa lagizo dya seuta, ulosi uwo ulavigwa komzi umkulu wa Shushani, wanangwa waditambalisa mwemikowa yose. Seuta na Hamani nendile nawekala wakanywa, mna awantu komzi wa Shushani nendile wakangawala.